Shillong: Ki 37 ngut ki khynnah wa puræ MBBS ha China kiwa da liwan cha Meghalaya hadien wa sdang mih pyrthai u Novel Coronavirus (2019-nCoV), neiliang kawa ektien ka chnat Department of Health and Family Welfare ka jylla, ka Dr. M. Marbaniang da ong ko wa kini ki khynnah ym em u pynyoo ki ya ki dak ki chin wa em ki ya uni u khñiang wei dang sah ki ha jar jiar ki yung yong ki.
Da ong ko wa dang booddien ki yei man i long kini ki khynnah man ka sngi wei katni dang man ki kiwa chait wei dang puræ ki kam ha Wangdong Province, Sichuan Province wa ha Yunnan Province.
Neiliang ki doctor ka sorkar da batai pynche ki ya kini ki khynnah iyi u leh wei iyi u dam u leh hadien wa wan ki na China.
Ka chnat da pynkrehkaam ko leh ya ka Integrated Disease Surveillance Team and Rapid Response Team wow boddien ya uni u khñiang.
Neiliang u montri ka chnat, u Alexander Laloo Hek da ong u wa ka jylla da man ko kawa da pynkhreh u yakhun pyrchah ya uni u khñianh wei waroh ki District Medical Health Officer, ki CHC/ PHC da phah ya ki u man ki kiwa husiar.
Da kyntu leh ya ki paidbah wow dam ki u tieñsar u hær’rngu deiwa pynrap wa ki Airport ha Guwahati wa Umroi leh da man ki kiwa husiar.
Ki khñiang Coronavirus toh kiwa em ha ki mrad wei manda poi ki ha ki bru kiwa yoh ya uni u khñiang chem chitom ki u riñ mynsien.
Discussion about this post