Ka HYC Shillong City hapoh i yahkhmat u Enlang Sawian, General Secretary ynnin ka sngi da lai yachem ki ya ka Deputy Commissioner yong ka East Khasi Hills District ka Isawanda Laloo kawa man leh kam ka Chairman yong ka District Selection Committee hawa yatoh wa i thung kaam thung jaam ha kani ka District.
Neiliang ka seiñ da yaklam sani bha ko wa ka DC hawa yatoh wa i rukom pynpsiah kaam neibhah wa ha kiwa boon ki por ym jooh pynhun i ya ki khynroo khyllood kiwa yaleh kreh hawa pynmih ya ka Result, wei ka seiñ da dawa ko wow pynkhlan ya ki kyndon thung kaam deiwa e yumut leh cha ka DC hajrong ki kattu katni ki bynta khnang wa i thap kaam u man ko da ka luti kawa khooid wei kawa pynhun ya ki khynroo kiwa yakhun wow yoh kreh.
Ka seiñ da e buit ko wow pynkrehkaam ya kini ki kyndon hawa khut yaleh kreh neibynta kiwon kiwon ki jait kaam wa kynthup ya kini ha wah:
- Toh u riñ dur da ki CCTV heipor wa thoh Exam, heipor wa chim Interview wei heipor wa kheiñ katwon wa da yoh Marks waroh.
- Mar ya dep ka Interview, ka Result toh u pynbna hapoh 24 kynta.
- Toh u pynyoo bniah ya i rukom yoh Marks.
- Neidaw wa i ktien Khasi toh ka Associate Official Language, toh u e laad ya kiwa yaleh kreh wow jied ki u thoh da ka English lane da ka Khasi.
- Ka DSC toh u man ko kam ka UPSC deiwa pynman Exam chisien chi snem wei ka Validity yong kiwa Pass toh u man ko chi snem. Wei lada man kamni, ym emkaam de wow thung Officiate neibhah mar ya lait kaam da ye wow thung da kiwa da dep Pass.
- Ki dkhot yong ka DSC ym toh wow emyatoh ki wa ki kaam seiñ hima sima.
- Ha i por wa booh ya ki phang kylli kitæ ki Objective Type Question hawa pynman ya ka Written Test, toh u em ym duna ya ka 5 Set. Ini daw yada na i ya bood uwi na uwi neibhah daw phær ki Number ki phang kylli.
- Ka Score Sheet wa e Marks kiwa chim Interview ym toh u em ka Over Writing.
Ka seiñ da dawa ko na ka DC wa toh u pynkrehkaam smat ya kini ki dawa yong ka seiñ hawa yatoh wa ki kynrum kynram heiwa neiliang ka DC da pynsñiaw ko yei sñiawsuk yei e yumut wei da kular ko wow paitbniah yow leh ya iwa emkaam. Neiliang ka seiñ daw booddien ko hadooh wa ka sorkar mynjur ko wow pynkrehkaam ya kitai ki kyndon khnang u man i myntoi ya ki khynroo wa thooh kreh.