Khliehriat: U District Magistrate, East Jaiñtia Hills District ynne ka sngi da pynbna u ya ki kyndon wa ye u leh hawa bia hapoh ka District kam heini i por wa em ka khlam u COVID-19.
Da ong u wa ki paidbah toh u bood ki ya ki kyndon wa da booh chwa, wei ki thaw bia toh u biang ki ya ki khiandwar (well- ventilated) namo lada ye toh u pynman ha lait wei ymtoh u pynemkaam ya ki Air Condition.
I thaw toh u man i iwa heh khnang wa kiwa wan u ye ki u jngai iwi na iwi kamwa 2 meter.
I thaw namo ka Hall toh u man kiwa da pynkhooid bha wei emkaam wow wan sylli (Inspection) da ki sahep wa bhah ki bor District wow pait yei rukom pynkhreh.
U tre thaw toh u booh u ya ki Hand Sanitizer ha thaw psiah wa thaw mih wei wow chim yutip hajrong kiwa wan cha ka bia, kiwa pynlai wa ki wakreh ha ka bia.
U District Magistrate da pyntip u leh wa kiwa wan bia ymtoh u em ki palat 50 ngut, ki bru wa em palat 65 snem wa ki khynnah wa hapoh 10 snem toh u man ki kiwa syndong wei ye leh u keh Online khnang wa kiwi ye ki u pait ya i bia.
Ki bru kiwa em ky’oh, synrum ymtoh u wan ki cha ka bia, toh u kiar u rah dei kti ya ki tiar e sñiawbha wei u pynchlur wow e sñiawbha lyngba ka Online wei waroh kiwa wan toh u Download wei u pynemkaam ki ya ka Aarogya Setu app.
Discussion about this post