U Dr. W.R. Kharlukhi, MP yong ka Rajya Sabha ynne ka sngi da booh mooyurim u neibynta u chna yaka Ramp namo ka luti wow pynsuk wow lai cha ka mala wa em ka Maternity Block hapoh ka Dr. Norman Tunnel Hospital, Jowai kawa da mang u chna hei lut kamwa T. 60 lak, hei emlang u Deputy Commissioner ka West Jaiñtia Hills u Garod LNS Dykes, u O. Lamin, MDC JHADC, ki Pastor, ki Tymmen Wasan, ki Nurse wa kiwi.
Ka Medical Superintendent, Dr. Norman Tunnel Hospital, Jowai, ka Dr. D. Nongpluh hawa khana tbian yei lai luti kani ka Hospital, da ong ko wa em chiboon i angnood kam ka Hospital tangwa neidaw wa duna poisa, ym ye ki wow lai chakhmat.
Da pynkynmoo haroh ko wa ha u snem 2001 ka Hospital da chah baam ko ha i diñ la kamwa mar chiteiñ, wei i dooh nong man ko iwa khroo khamtam ya ka thaw kha khon, ka thaw booh yaki manbei wa kha khon, kawa dang dep pynthymmme wot ha itu i por wa jia, neitæ da chah ktah leh ka thaw pooid deilang wa kiwa boon ki tiar.
Ha u snem 2015-16 da pyrkhat ki wa emkaam u chna yaka Maternity Block kawa thymme, tangwa hadien wada dep chna leh, ym pu ye ki wow pynkrehkaam neibhah wa katkam ki kyndon sorkar wymtoh u em ko haka mala wa ar khlem ka Ramp neibynta wow suk i lai i wan ki manbei wa punkhon.
“Neitæ hadien chiboon i pynkylla neiwa da pynwan dur wow chna yaka yung Hospital, khaddooh poi kani ka sngi wow sdang chna noh yaka Ramp, hanla em i du chiteiñ ka poisa na i dor wa da mang,” khana ka Dr. D. Nongpluh.
U Dr. W.R. Kharlukhi kam u bru wada kha ha kani ka Hospital wei ka bei yong oo leh kawa kreh kam ka Nurse ha kani hi ka thaw, ong u wa sñiaw dap ram bha u ya kani ka Hospital kawa da yoh u yei rynyieñ kamwa man u katni.
“Dap O dei sñiawburom ya phi ki Doctor ki Nurse ki wakreh waroh, wa haka pyrthai katni kawa ki bru yabeh ki yaka spah ka phaw, sñiaw sarong O wa dang yoh O u yieñ hapyrdi ki bru wa em yei mynsien maya u kreh yei kaam neibynta ka jaitbru wot hei su wa khian,” ong u Kharlukhi.
Chooh chooh ong u wa ha u snem wa dep neidaw u COVID-19 da pynsangeh yaki Scheme MP, tangwa yooluti u wa manda sdang biang ka Scheme, daw yarap u ya kani ka Hospital.
“Nga kular ko ya phi wa dei yachong pyrkhat chirup wa kiwa pynlai kani ka Hospital, u chim O kam ka thong kreh yong nga heiwa katwa ye wa lah u yarap O yaka thaw wa yoh O yei im wei kawa nga da heh da san O kamjooh haka,” pynkut u Dr. W.R. Kharlukhi.
Kiwi won wa e yei klam kynthup ya u Administrative Officer u M.S. Lhuid, u Rev. N.S. Phawa, T.Bn M.K. Siangshai, Dr. B. Dkhar wa kiwi kiwi.
