U Symbood Montri Rangbah ka sorkar jylla, u Sniawbhalang Dhar ynne ka sngi sa wan booh mooyurim u neibynta u chna yaka AYUSH Hospital wa em 30 palong namo ka 30 Bedded Integrated AYUSH Hospital ha chnong Mookyndur, West Jaiñtia Hills District hei emlang ka Montri yong ka chnat i chait i khiah, ka Dr. Mazel Ampareen Lyngdoh, u Commissioner & Secretary ka Health & Family Welfare uwa man leh kam u Director ka AYUSH, u Dr. Joram Beda, u MLA ka Jowai Constituency, u Wailadmiki Shylla, u MDC ka thaaiñ, u Jessie Suiam, u DC wa SP ka West Jaiñtia Hills District, ki Doctor ka District wa kiwi de.
Ya kani ka Hospital da mang u chna hei lut wa Rs. 10 klur katkam wa khana u Sniawbhalang Dhar wei yei thaw da e sñiawbha da ka chnong Mookyndur iwa heh kamwa 5 Acre.
Ka Dr. Mazel Ampareen Lyngdoh hawa klam ong ko wa lyngba kani ka Hospital daw yoh yei sumaar katkam i stat AYUSH, wei i jait sumaar wow yoh ym du yong AYUSH tangwa yong Homeopathy kamjooh.
Kani ka thaw u man ko leh ka thaw wa ye u yoh sumaar ya kiwa boonjait ki kjut wa em ha u bru, wei kawa yarap u pynjem yei kjut deiwa wer-wer.
Neitæ u Sñiawbhalang Dhar hawa klam da pynsñiaw u ya ki kaam wa ka sorkar da leh ko neibynta i myntoi ki paidbah wei i booh mooyurim neibynta u chna ya kani ka AYUSH Hospital leh ong u man ko kawa emkaam bha katni.
Kyntu haroh u ya ki sahep wow booddien neipor cheipor khnang yow ye u pyndep heipor wa biang.
Wei i ye u wanrah ya kani ka Hospital daw man i myntoi wa khroo yaki paidbah ka thaaiñ kiwa emkam yei sumaar lyngba i pure AYUSH wa Homeopathy.
Da ong u leh wa kani ka sorkar toh kawa chah pynbaad bait wei i daw toh wa kreh ko yei kaam, u dooh yei chah pynbaad toh du lada yoh da ka sorkar wa thiah sngi donhi.
Kiwi won wa klam wa kynthup ya u Wailadmiki Shylla wa u Dr. Joram, da yaroh ki yaka sorkar deiwa ong wa man ko kawa chimkhia kawa kreh chitom u wanrah i roi i paar ha kiwa boon ki bynta haka jylla.
Discussion about this post