Jowai: Ha ki sngi wa chwa wow poi ka sngi thap Vote kamjooh hadooh ka sngi thap Vote ki pulit da pyntip ki wa da yoh ki boon ki ujor yeiwa em ki bru wa saam poisa yow thied Vote.
Ha ka 27 tarik ki pulit da yoh yutip ki heipor 1:30 i sngi wa da em ki bru wym tipmit kiwa saam poisa ha chnong Diengsomoud kawa haap hapoh ka 12-Umroi Constituency.
Ki pulit da lai ki wut wut cha kani ka thaw wei da pynsangeh kari ki yow chem ya kiwa kit poisa tangwa wa da chem ki napoh i khloo T. 24,110 wa em hajan ini i thaw.
Ha ka 26 tarik u Neini Bareh, President, VDP Sutnga, EJH da ujor u wa heipor 9:15 i miet ki dkhot ka VDP da yoo ki wa u Memong Pdang, SDO (PWD) Sutnga, u Phrawa-O Lamurong, SA (PWD) Sutnga, u Sawan Nongtdu (uwa kreh sorkar), u Fullmoon Supooh (uwa kreh sorkar), u Forgive Dkhar, u Sanki Dkhar, u Sanki Lamurong, u Unkyrkhu Supooh wa u Kampher Sutnga da saam poisa ki cha kiwa thap Vote hapoh ka chnong.
Ki VDP da kem ki ya kawi ka kari wa em ya u number ML-04A-4779 wei chem poisa napoh kani ka kari wa ki tiar pynmynsoo.
Heipor wa mut u kem ya kini ki bru da chah dat u dkhot ka VDP u Duni Sutnga wei da ieh ki ya ka kari yong ki ha ini i thaw.
U Mondlingstar Pdang, Sector Officer-3 ka 6-Khliehriat Constituency da ujor u wa ki pulit wa ha ka 26 tarik won heipor wa liwan u cha i yung u wa em ha Sutnga, u pyrsa u da pyntip u wa em kiwa tooh ka ka Voter’s Slip yong oo.
Hadien ini uwa ujor deilang wa u lok yong oo u Phrawa-O Lamurong da mih ki na ini yung da ka kari wei hadien wa liwan biang ki da em 12 ngut ki bru wa tip kam u Bhalang Patlong, Anthony Pala, Dunidaibunki Rupsi, Kerlang Patlong, Ailad Sutnga, Pynbait Sutnga, Fortuinate Chyrmang, Riping Suja, Wowni Pala, Last Bamon, Bantei Bamon wa u Rightful Chyrmang da pynsangeh ki ka kari yong ki wei da dat ki da ki dieñ, ki tari wei da maham ki ki. Kamtæ da mynsoo kiwa chah dat.
Ha ka 25 tarik u Roitre Dkhar wa u B. Phawa, Secretary chnong wa ki dkhot ka VDP ka chnong Iongkaluh da ujor ki wa heipor 11:30 i miet, u Amos Dkhar wa kiwi da poi ki chapoh ka chnong da ka kari Maruti Alto-800 ML-05M-4394 wow saam poisa cha kiwa chong chnong neibynta u kyrtong BJP na 5-Sutnga-Saipung Constituency wei da maham ki leh ya kiwa chong chnong.
Ki dkhot ka VDP hadien wa tip ki ya ini da lai ki wei da chem ki wa em i saam poisa wei u Amos Dkhar leh da phah u ya ki lok yong oo wow dat ya ki dkhot ka VDP wei da yut ki na ini i thaw.
Hadien won kiwa chong chnong da ong ki wa u Amos da pynsih u ka ka kari wa wan u wei da pynbaad u wa ki VDP wa kiwa chong chnong toh kiwa emkti wow pynsih.
Discussion about this post