Boon kiwa da kyruiñ cha i sumaar Ayush, i chna ya ka Hospital ha Mookyndur da lai i chakhmat: Wailadmiki

U Montri ka chnat i chait i khiah ka sorkar jylla, u Wailadmiki Shylla hawa chimbynta wow sakhi kam u kongsan ya ka lyngkhooh snem wa chiphaw ka laad e sumaar Ayush wa tip kam ka 10th Ayurveda Day wa da pynman da ka yung krehkaam ka District Medical and Health Officer, West Jaintia Hills ha District ha Auditorium ka District Library, Mynthong Jowai ha ka 25 tarik uni u bnai hajrong ka phang Ayurveda for People & Planet, da e yaroh u ya ki laad e sumaar Ayush neibhah wa kat nang mih ki sngi kiwa boon ki bru da sdang ki wow kyruiñ cha kani ka laad e sumaar, ymtoh de kam ha ki por nachwa wa yabeh ki du ya ki laad e sumaar wa ye u smat yoh næ smat yoo yei kylla.

Ong u wym ye leh u len boi wa em i eh wa mih hadien neiwa thooh ki laad sumaar wa smat, wei na ini i daw boon ki bru kyruiñ noh ki cha ki laad e sumaar Ayush.

Ha kani ka sngi khana u wa neiliang ka sorkar jylla leh da yaleh ko wow pynheh ya ki laad e sumaar, heiwa ym slem de daw wai noh ya ka Ayush Hospital ha Sohra, i pynkreh ya ka Ayush Hospital wa 30 thaw thiah ha Mookyndur, West Jaiñtia Hills dang lai i chakhmat wa i thmu u wanrah ki kaam pynroi wa yatoh wa ka Ayush ha Ri-loom Garo leh da lai ko chakhmat.

Ong haroh u wa ka Ayush ym du wa man ka laad e sumaar tangwa kawa yatoh leh wei rukom im bru, neibhah ha kini ki sngi ym em kawon kawon ka dawai wa biang tam lait na i rukom wa biang wa bha wow sumaar yei doh i pran.

Related posts

Na ki 8 ngut wa mynsoo ha Thangskoo kiwa chah sumaar ha NEIGRIHMS em kiwa em hapoh CCU wa ICU

February 7, 2026

Pynlait paidbah ka Frank Motors ya ka Tata Sierra 2.0 yow pynim biang ya kani ka kari wa bna naam  

February 7, 2026

Heiyatoh wa i eh ha ka jylla neidaw wym pu em ki thaw chna pynmih dawai namo ki Pharmacy, kamtæ kyntu u ya ki Doctor ka jylla wow mih ki chakhmat u yahluti ym u kut du ha ki laad e sumaar.

Ong haroh u wa katwon u man i kmen wa khroo lada ki bru yong i hi pyrchang ki, khamtam wa ka jylla yong i toh kawa em chiboon ki kynja dawai kynbat ha ki khloo.

Ha kani ka yalang lehkmen lyngkhooh snem da emlang u Deputy Commissioner ka West Jaiñtia Hills District, u Abhinav Kumar Singh, ka Dr. P. Shylla, District Medical & Health Officer, West Jaiñtia Hills wa kiwi wei da saam leh ki khusnaam cha kiwa jop ha ka yakob thoh Essay.