Ka Meghalaya Football Association (MFA) da pynlait ko ya i pyrtuid kiwa yalehbol wa ye u kyrriah (Transfer) hapyrdi ki District neibynta u snem 2026.
Ha waroh da em 278 ngut kiwa da pyndap pyrtuid wow transfer iwa da hiar na ka 329 ngut ha u 2025 wei da khang yei ye u Transfer ha ka 31 March.
Ki Team wa tipmit da ka Shillong Sports Association da soi ki ya 80 ngut na kiwi ki District Association. Ki Club hapoh ka Thadlaskein Sports Association da em ki 56 ngut katwa na East Jaiñtia Hills District Football Association em ki 42 ngut wei kini man kiwa dang yalehbol bha.
Ki Club ye ki wow pynemkaam ya ka Transfer wow pynkhlan ya ka dhab yong ki chwa wa ki District Association u pynman ki ya ki League neibynta u 2026 wei chwa wow sdang ka 5th Meghalaya State League wa pynman ka MFA neibynta ki Club wa pawnaam ka jylla ya ka wow sdang hawa kut uni u April.
U General Secretary ka MFA, u Sunesh Syiem da pynkynmoo u wa waroh ki District Association ymye ki wow yalehke palat ya kawi ka District Sports Association ha ka chi snem. Ya kiwa yalehbol wa ki District Association wa leh pyrchah yeini daw pynchitom ya ki da ka MFA katkam wa yoobiang.
Discussion about this post