Boonsien dooh ki bru yei mynsien hawa yatyrrah kari neidaw wym em pyndait Seatbelt ki

Jowai: Ka 29^th National Road Safety Week kawa sdang nadooh ka 23 tarik uni u bnai da pynkut ya ka ynne ka sngi ha MTC Bus Stand Iawmusiang da ka yalang wa pynman da ka yung krehkaam u DTO ka WJH hei yakrehlang waka yung krehkaam u DC wa SP ka West Jaiñtia Hills.

U DH Pde Traffic In-charge ka Jowai Police Station da khana u wa nadooh u snem 2014 hadooh u bnai Wisu (March) 2018 da em 353 tylli ki yatyrrah kari wei da dooh ya 20 tylli ki mynsien ha West Jaiñtia Hills.

Da ong u leh wa da em ki bru wa lait im wa lait nei mynsoo neidaw wa pyndait Seatbelt ki, wei boon leh kiwa mynsoo joor kiwa khlaad kiwa ym em pyndait Seatbelt ym du ya uwa yah kamjooh leh kiwa chong hapoh kari.

Neiliang ka yungkrehkaam u DTO da klam u MVI u V. Ryngkhlem uwa da khana ya kiwa boon jait ki Traffic Sign wa pynyieñ cha rood sarok kiwa em wa pynyooluti, em kiwa maham wei em kiwa e yutip wei emkaam u ngait ya ki yow lait u jia ya iwa yatyrrah kari, ym toh u psiah cha ki sarok One Way neiliang wa bakla, ym toh u yah ya ki kari cha ki luti syngkieñ da khang wow lai wa kiwi kiwi.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U kongsan ha kani ka sngi u DM Wallang, ADC da ong u wa ymtoh wow pynhær kari, wei toh u man kiwa emakor heipor wa yah kari khamtam kiwa yah kari kamai kiwa pynhiar pynku bru deiwa sangeh syndet ha pyrdi sarok kawa booh yei ma lada wan ki bru na baar ki wymtip yeini i myllien kiwa yah wei daw mih bait ka ya tyrrah kari.

Da klam u leh yei chong khynnia hapoh kari hadooh wow pyndait Seatbelt leh ym hoi de wei lada em ka ya tyrrah kari daw em iwa sñiawsih wa jia, kamjooh da klam u yei yah kari dei muaid, i pynheh sur hadooh wa da kyrbeh wa ki yung ki sem kamtæ da kyntu u ya ki paidbah wow ujor ya kam kini cha ki pulit.

Heijooh i por da klam u chaphang ka aiñ heiwa boon ki por ki bru wa bakla u yah kari hadooh wa dooh yei mynsien ki bru ym em chah pynchitom ki.

Ha kani ka sngi da yoh leh yei pynyoo wa kammon u yarap ya kiwa mynsoo namo ka leh First Aid wei da emlang leh ki sahep ka PWD, u DM&HO, ki heh pulit wei ya ka yalang da pyllai da u DTO ka WJH u R. Tariang.