15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Kynreh ka KHNAM wa ki ar seiñ ya ki kot ki sla ki kari wa kamai ki baar jylla

0 Comments

Shillong: Ka KHNAM-Youth Wing ryngkat wa ar tylli ki seiñ yong kiwa kamai kari, ka Hynñiewtrep Tourist Taxi Association (HTTA) waka Khasi Jaiñtia Local Taxi Driver’s Association, ynne ka sngi da kynreh ki ya ki kari kamai (Local Taxi) wa yah da ki baar jylla kiwa kamai ha nongbah Shillong. Ini i kynreh toh wow pyntikna wa kini ki baar jylla kiwa kamai em ki ya ka Labour License wa ki Work Permit na ka KHADC.

Ha ini i kynreh neiliang kini ki seiñ da chem wa boon ki baar jylla kiwa kamai ha Shillong ym em kot ki wot tang kawi leh khamtam kiwa toh u yoh ki na ka KHADC.

Advertisement ad1

Hawa yaklam wa u President ka KHNAM-YW, u Thomas Passah da ong u wa ka seiñ ym yohsa ko wow chim ya kani ka rai wow kynreh ya ki kot ki sla na kini ki baar jylla neibhah i wym mano ka KHADC wow leh yeini wot hadien wa e por ka seiñ kamtæ da chah pynbor ki wow leh yeini ynne ka sngi.

Da pyntip u wa chwa wow leh yeini da paan yarap leh na ki pulit Enforcement yong ka KHADC wow chemdien yeiwa sakhiat, tangwa neiliang u EM ka tnat Labour ym em phah u yeini iwa pynyoo yei kheiñstiñ ka KHADC ym du ini wot hadooh wow kynreh yei kynreh ya ki kot ha ki por wa da dep ha NEIGRIHMS, da pynbaad u wa ki MDC ka KHADC wa ym em kreh hok ki wow yada ya ka jaitbru.

U Thomas da ong u wa ini i kheiñstiñ ka Council da pynroi ko ya ki baar jylla, wei toh na ini i daw wa wa boon ki khynroo khyllood dooh kreh ki iwa da ktah leh ya ka yarong poisa ka KHADC. Da pynrap u leh deiwa ong wa kiwa kamai kari ym em ki ya ki Labour License waka Work Permit wei ymtip ki leh toh ya kini kot neiwon u yoh ya ki.

Heijooh i por da ong u wa ka seiñ da chim ko ya ki pyrtuid yong ki kamjooh leh ki number kari yong kini ki baar jylla wei hadien ini i kynreh iwa daw pteiñ palat chi bnai wei manda yoh yukheiñ waroh daw ujor noh ki cha ka aiñ pyrchah ya kini ki bru.

Ka seiñ da phylla ko wa em ki kari kiwa thoh lieh thoh yirngam kiwa toh ki Permit kiwa yaphær na kiwi tawon ki kari kamai neibhah da mang kyrpang ya ki wow kamai cha khap sor wa ki thaiñ nongkyndong, tangwa kini ki kari kamai ki ha sor da ki baar jylla wei da man tre leh ya ki da ki baar jylla.

Da ong u wa ini i yohlaad ki wow lehmon mut i wa ki pulit ym em kreh hok ki yei kaam yong ki wei pynyoo i leh wa em iyi iyi cha lyndet.

U Thomas da kyntu u leh ya ki tre kari hawa e kreh ki ya ki baar jylla toh u pyntikna ki wa em ki ya ki Labour License wa ki Work Permit wa da e da ka KHADC.

Previous
Next

0 Comments

Leave a Reply