Da: U Babu Kular Khongjirem
Ha kine ki snem mynta, bun ki Party ki kham sngewtynnad ban shu thung (Nominate) da ki nongkitkam kiba na jrong (High Level) ha ka jaka ban ailad lang ia ki nongkitkam bad ki nongkyrshan ka Party na ki shnong (Unit) ne ki Polling Station bapher bapher ba kin ia don bynta lang ban ia jied (Elect) ia ki Candidate ha ki Constituency bapher bapher. Ki khein jem ne shim suk beit (Take for granted) ba ki Candidate ba la jied da ma ki na jrong (High Level), ki nongkyrshan bad riew ieit Party kin shu kohnguh beit khlem kyrngah shuh namar ki shim beit ba lada ong ma ki lieh, ki nongkyrshan ka Party ruh kin dei ban shu ia lieh lang bad lada ong ma ki iong ruh, ki nongkyrshan Party ruh ki dei ban shu ia iong lang.
Ban shu khein bein ne khein kai ia ki nongkyrshan Party man ka shnong ka long kaba ma shibun. Kane ka rukom leh bad pyrkhat ka bakla shi kat dei eh khamtam ha kito ki Party kiba khein ne shim ba ki dei ki Party jong u paidbah (Democratic Party).
Kiba bun hi ki nongialam kiba na jrong (State/District Level) kim da salia ne kim da niewkor than eh ia ka sur u paidbah. Wei ki la mon ne i bang ma ki, thrait thrait, hangto hangto hi khlem pynslem shuh ki shu pynbna ia ka kyrteng ki Candidate. Bun ki paidbah na ki shnong bapher bapher ki shu ia ang lyngngoh bad kyndit lut haba tang ia ka durkhmat dur khmut bad ka kyrteng u Candidate jong ki ruh kim pat da ia tip bad iohi satia ia u ne ia ka.
Ynda u Candidate u leit sha ki paidbah sha ki shnong bapher bapher ruh, ki nongkyrshan Party ki ong pynban ba u dei u Candidate ka High Level ba shu pynhap beit na bneng khlem da ia syllok lang ia ki. Lada jied ne ym jied ia u ruh, ne lada jop ne rem ruh, lah tip bad kitkhlieh hi ka High Level ia u nadong sha dong namar la shu thung hi da ka High Level. Namar ka jingbym ia donbynta lang jong kiba bun ki paidbah ha ka rukom ia jied ia u Candidate, ka jingkitkhlieh ne ka jingtrei shitom ban trei shit rhem ban pynjop ia u ne ka Candidate ruh ka kham shong per bad sting thew noh. Jin lada ki ailad ban don bynta lang ki paidbah nongkyrshan na ki Unit bapher bapher ba kin ia don bynta lang ha kaba ia jied lang ia u Candidate, kata ki paidbah nongkyrshan Party ruh ki sngewtrai bad sngew kitkhlieh lang ia ka kam bad kin hap ban ia trei shitom lang na ka bynta ban pynjop donburom ia u/ka Candidate namar lada u rem, kin sngewsih bad sngew sah pap bad jah burom ia ka jingiarai lang ma ki.
Ngi iohi ba ha kiba bun bah ki Constituency, la ki dei na ki National ne Regional Party, ki mih pynban ka huri-hura, jingia pait ia pra bad jing bym ia sngewthuh jingmut para nongkyrshan jong kajuh ka Party wat ha ka juh ka Constituency ruh. Ia ki nongkyrshan Party kiba kham rim la niew bein bad ym don ba ithuh shuh ia ki. Ki sa sdang ban wad briew ne nongkyrshan noh da kiba thymmai. Hynrei, kane lei lei ka nang sniew bad nang pyn kulmar shuh shuh pynban ar shah lai shah. Kiba rim ruh lah duh jing shaniah, kiba thymmai pat dang ar tatien ban shaniah. Bun ki Candidate jong ki Party bapher bapher ki ban shu rem ei kha-ma-kha khlem poi pyrkhat tang na ka daw jong ka jingsngew sarong bad leh ba heh (Dictatorship) jong kine ki nongialam Party bapher bapher ha kane ka MLA Election kaban sa long shen ha u snem 2023.
