U Auspicious Lyngdoh Mawphlang da klam che u wa daw yakhun bait ya kani ka Election MLA ka wow wan ha u snem 2023 kam u kyrtong yong ka seiñ Peoples’ Democratic Front (PDF) na Mawphlang Constituency.
Ini i pynsñiaw yong u Auspicious toh hadien wa da mih ka khubor wa neiliang yong ka seiñ United Democratic Party (UDP) da wan ko chakhmat wow tyrwa Ticket ya oo wow yakhun noh ya kani ka Election na ka seiñ UDP.
“Hao em i tyrwa neiliang yong kiwa kitkaam yong ka UDP, tangwa nga da pynsñiaw O ha ki wa ym man de wow pyrkhat kamtæ, neibhah nga da dep O wow rai u yakhun ya kani ka Election na ka PDF,” da ong u Auspicious hawa klam wa uwa thoh khubor.
“Kamwa nga da dep wow rai, nga u yieñ bait O ha ka yurim wow mih chakhmat kam u kyrtong yong ka PDF ha ka Election MLA. Ha kini ki sngi daw khut pynman leh ya ka yalang paidbah wow pynche lut hajrong kini kiyi kiyi waroh khnang wa ym yah cha i artatien yong ki paidbah,” da ong u Auspicious uwa man leh uwa yahkhmat ka PDF.
“Nga kwah O wow pynche paidbah wa kamwa nga da dep wow rai u yakhun na ka PDF, kamtæ hi u lai bait chakhmat hadooh wa kut, hanla da em i tyrwa wa da wan na kiwa kitkaam ka UDP, tangwa u yieñ skem bait ha ka yurim kamwa nga da dep wow rai deilang wa ki paaid wa kyrchaan,” da klam skem u Auspicious.
