Kiwa yalehbol U-20 Boys ka Meghalaya, u yoh sikai ki ha ka Elite Training Camp yong ka Olympique Lyonnais Training Academy wa em ha Lyon, France.
Ynne da pynman ya ka yalang wow kitbok kitrwiang ya ki deiwa emlang u Montri Rangbah, u Conrad K Sangma uwa da ong wa kani ym man ko du kam ka Training Camp, tangwa man ko kam ka dwar wow tip yeiwa thymme, yow man kiwa ryntih wei kiwa pliah chooh chooh hei kaam.
Da ong u leh wa kam ka sorkar toh kawa da rai wow yahluti wei wow e ki laad neibynta kiwa yalehke ka jylla yow ye ki u heh u san hadooh wow ye u yakob wa kiwi hapoh ka pyrthai.
Kani ka Training toh kawa nadooh ka 5 tarik hadooh ka 25 tarik uni u bnai deiwa chimbynta ki 28 ngut kiwa yalehke.
U Conrad da pyntip u wa hadien wa poi ka File ha oo neibynta ini i kaam heiwa daw hap pynlut Rs. 2.80 klur, da ong u wym em artatien u neibhah kani ymtoh wa pynlut poisa tangwa ka poisa wa pynemkaam neibynta ka mynried.
Kam wow pynkynmoo wa ka Meghalaya Football Team (U-17) kawa na Myngken Christian Higher Secondary School ha uni u snem da lai chimbynta ko ha ka 2nd Indo-French Football Tournament ha Paris, France heiwa da yoh ko hei wa le wei neilang ka sorkar da pynlut ko Rs. 50 lak ka bai luti ki.
Hadien ini, ka ka Olympique Lyonnais Training Academy da tyrwa ko wow e sikai yalehbol ya kiwa na Meghalaya.
Discussion about this post