Ka Dorbar Chnong Tuber Kmai Chnong dap ko dei sñiawngooh wa khroo ya ka Ramakrishna Mission Ashram (RKM), Sohra khamtam ya u Secretary ka Ashram u Swami Anuraganandaji yei smat yong ki wow pteiñ yei chakri paidbah deiwa saam ya ki marbaam cha ki manyung kiwa dooh wa duk, khamtam ha kini ki por khangsbak wa chem chitom ki paidbah u khih mylla sngi.
Kani man ko ka sien wa ar ya ka Mission hei e yarap ko ya ka chnong heiwa da saam ko da u khoo 25 kg wa u dai 5kg cha kawi kawi ka manyung wei da em kamwa 100 tylli ki manyung kiwa myntoi ha kani ka sngi.
Ka Dorbar Chnong da dap ko dei sñiawngooh chooh chooh ya kiwa kreh ka Mission wa emlang ha kani ka sngi, u Swami Sitaramananda u Cashier ka Mission, ka Gitabali Majaw, kiwa kreh, kamjooh ya u Manbha Lyngdoh uwa yahkhmat yei chakri ka Mission cha Ri-loom Jaiñtia.
Ha kani ka sngi da emlang u waheh chnong u Jiedlang Sana, u Secretary chnong u Micky Lyngdoh, kiwa kitkaam chnong, u Helping Phawa, u waheh chnong Mutong wa u khynnah skur warim ka Ramakrishna Mission Sohra, u Ribait Phawa.
Hei klam, u Manbha Lyngdoh da ong u,”Ka Mission sñiawkmen ko wa yoh ko u yarap kyllooid mynsien ya kiwa dooh wa duk lyngba i synniang yong ka,” deiwa pynrap ya i klam u Swami Vivekananda iwa ong wa i chakri ya ki bru man i kam i chakri Blai.
Ka Dorbar Chnong da kitbok kitrwiang ko ya ka Mission yow ye chooh chooh ko u pteiñ i chakri i yong ka ha man la ki liang cha ki paidbah ka Ri-loom Jaiñtia.
