theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Cha sor kam ki Boss katwa cha khappood toh kiwa tieñslah ki pulit ka Meghalaya, ong u GS ka JSU

Ki san tylli ki seiñbhalang wa kynthup ya ka Khasi Students’ Union, ka Federation of Khasi Jaintia and Garo People, ka Jaintia Students’ Union, ka Hynniewtrep National Youth Front wa ka Ri-Bhoi Youth Federation da pynman ki ya ka yalang sñiawlem ya kiwa chong chnong ka Mukroh wa kamjooh i thang mombati neibynta ki mynsien wa da khlaad hei chah siat pynsih ha ki pulit Assam.

Hawa klam ha kani ka yalang, u President ka FKJGP, u Dundee Cliff Khongsit da ong u wa sa katwon ngut ki metyap wa ka jaitbru u dooh noh ko neibynta wow yoh ya u pood u ang uwa skem wa ki khappood kiwa chong chngaaiñ.

Advertisement ad1

Da ong u wa kam kini ki jia da pynjemdaw ya ka jaitbru wei da ong u leh wa kini wa jia toh nei wym chimkhia yong kiwa yahkhmat ka jylla. Da ong u wa lada ka sorkar MDA chimkhia yei yaklam wa ki seiñbhalang ym wan kam ini i jia ha Mukroh.

Uwa yahkhmat ka FKJGP da ong u wa kiwa yahkhmat wa em ha Secretariat toh u chim ki yei kitkhlieh hajrong i jia ha Mukroh. Da dawa u leh wa ka sorkar toh u booh ko ya ka Police Outpost hapoh 1 Km na khappood.

Neiliang u General Secretary ka JSU, u Treibor Suchen da ong u wa ha u snem 2002 da em 6 tylli ki mynsien wa da dooh ha katai ka thaaiñ wei kamjooh da em biang i dooh mynsien ha u snem 2020, tangwa iwa sñiawsih toh wa hadooh uni u snem leh dang dooh biang ya ki paradoh parasnaam ha katai ka thaw. Da booh yukylli u leh ya kiwa chong ha Secretariat iyi leh ki hadooh katni hawa boon tylli ki mynsien kiwa da dooh.

Uwa yahkhmat ka JSU da ong u wa ki pulit ka jylla Meghalya toh kiwa choon yong ka jaitbru neibhah cha khappood toh kiwa tieñslah tangwa hapoh sor da leh ki kam ki Boss wei yoo lakam wow siat ya ki khynroo hawa kbai ki neibynta wow im ka jaitbru.

Advertisement ad1
Share this:
Previous

Hakhmat u MLA ka NPP beiñ ka President ka STIEH yaka NPP

Next

Da leh ka sorkar yeiwa emkaam yei artatien ki kari wa kit phniang u psiah chapoh ka jylla