Ka Khasi Students’ Union ha ka 2 tarik uni u bnai hapoh i yahkhmat u Lambokstarwell Marngar, President ka KSU deiwa kyrchaan lang u Finance Secretary, u Manly Nongpluh, u Litigation Secretary, u Shemphang L. Mawphlang wa kiwi kiwi ki dkhot ka seiñ, da yoh ko wow e yarap da ka poisa wei wow kitbok kitrwiang ya ki khynroo Khasi kiwa em ha ka kynhun Muay Thai Association of Meghalaya ki wow lai mihkhmat cha ka Muay Thai World Championship ka wow sdang nadooh ka 3 tarik hadooh ka 12 tarik yong uni u bnai ha Phuket, Thailand.
Kini ki khynroo wow lai e reiñ cha katai ka lympung toh kiwa em hapoh i pait ka United Muay Thai Association ka India kiwa kynthup lang ya u Angelus Sun wa u Pynsuklang Sumer kam ki International Referee wa ki Judge. Neitæ kiwa yakhun toh u Pynnehbor Mylliemngap uwa daw yaleh ha ka Senior Men’s Category 51 kg. U Mightyson J Nonglang won daw chimbynta u ha ka Senior Under 23 years Men’s 48 kg.
Ka KSU ka sñiawkmen ko chiboon katwa dang mih ki sngi ki khynroo da nang ku ki ha waroh ki liang neibhah kamwa da thrang dik dik wow pynku ya ki khynroo tre ri, kamtæ leh daw yarap wow e sñiawbha katwa joh i bor. “I kyrmen i wa kini ki khynroo kiwa daw lai chapoh katai ka ri daw wanrah ki leh yei naam jop wa i burom ya kiwi leh yow tipmit ya ka jaitbru Khasi yong i”.
Neiliang ka Muay Thai Association of Meghalaya ka da e khublei kyrpang yei yarap wa i kitbok kitrwiang yong ka KSU seiñbei neibhah ym em kiwon kiwon kiwa wan chakhmat wow leh kamni ya ki.
