Shillong: Ka dhab ki khynnah hapoh ka Aroha daw lai chimbynta ki ha ka yakop rwai ka wow pynman ha Llangollen, Wales ka wow sdang nadooh ka 2 tarik hadooh ka 8 tarik Naiynñiaw (July) uni u snem.
Kini ki khynnah toh kiwa da chah hikai ha ka Aroha nadooh u Kmaichonglaad (Dec) ynnin u snem wei da pynkhreh ki wow ya chimbynta ha katai ka lympung.
Hawa yaklam wa ki laad pathai khubor neiliang ka Pauline Warjri da ong ko wa da em 20 ngut ki khynnah kiwa ka Aroha da jied kyrpang wow yoh sikai wow lai yachim bynta ha katai ka lympung rwai.
Ka Warjri da pynsñiaw ko leh yei sñiawsarong wa kini ki khynnah ki wow lai chimbynta ha ka tai ka lympung kawa heh toh wow kyntu wei wow rah burom ya ka jylla wei da pyntip chooh chooh ko wa da em kamwa 40,000 ngut kiwa chimbynta na ki 40 tylli ki dhab na kylleiñ ki ri ka pyrthai.
Hei jooh i por da pyntip ko wa emkaam T. 40 lak ka lut ka sep tangwa hadooh katni ya kani ka poisa da yoh du chiteiñ donhi kiwa da e sñiawbha ki manbei manpa kini ki khynnah wei yow yoh ya waroh daw pynman ya ka tamasa wow pynmih poisa chooh chooh wa kynthup ya ka Food Fest ka wow pynman ha kani ka 24 tarik ha ha All Saint’s Hall.
Da ong ko leh wa hadooh katni ym em i yoh yarap naka sorkar kamjooh ki seiñ kiwa da pawnaam ka jylla wei daw paan yarap hi ki leh na ka sorkar jylla.
Discussion about this post