U Nidame Dkhar uwa chong wa sah ha Dulong, Jowai uwi naki khynroo wa uiñ wa lai deiwa yah Cycle wa da tam 15,000 Km ha ki 2 snem deiwa pynemkaam yaka Cycle hawa lai khih lai kreh, lai uiñke suwari wa kiwi kiwi i emkaam yong oo, haka 22 tarik uni u bnai won da mih u na Jowai wow lai daka Cycle chadooh cha Aizawl, Mizoram deiwa rahlang yaka wyrta yong i lyngkhooh dap 160 snem i yap u Kiang Nangbah u khlawait ka Ri-loom Jaiñtia.
I lai luti yong oo da chimpor ko kamwa ar sngi chiteiñ hei jngai kamwa 340 Km.
Hei lai luti yong oo lyngba ka Silchar da khana u wa da yoh u wow yachem wa ki bru Pnar wa chong wa sah ha Cachar District ka Assam wei da sah miet u leh ha ka Hostel ka KJP Assembly House Mission Compound wa em ha Silchar.
Ha ka sngi wa bood da yoh yachem u waki bru Pnar wa sah ha Mizoram hapoh ka Kolasib District kiwa em kamwa 80 yung haka dong Khasi kiwa da chong ha katai ka thaw da ki boon phaw snem.
Haka sngi wa le won poi u ha Aizawl, wei kamwa rah u ka wyrta dap 160 snem i yap u Kiang Nangbah ha kut ki thaw wa yachem u waki bru Pnar ka jooh hi ka wyrta leh rah u cha ki bru Mizo.
Ha Aizawl yoosuk u wow yoo yei duna ki baar jylla wa wan chong chnong wei boon leh ki jait khih jait kamai wa da khih da ki bru yong ki hi nadooh ki kaam soor, kaam thaiñ waphær waphær wa kiwi de ki jait kreh.
Ong u wa hei lai luti yong oo yoh u boon i yarap na ki bru Pnar, ki bru Assam, ki bru Mizo, ki bru Tripura kiwa yachem u ha luti wa kynthup nadooh i baam i dih, i yarap pynyoo thaw sah miet, wei wym em leh sñiaw palat chnong næ sñiaw langam u wot hawa em u cha kawi ka jylla neidaw wa yoh u i maya na kiwi won ki jaitbru.
Heijooh i por kyntu haroh u yaki lok ki jor u pynemkaam ki ya ka Cycle kam kawi na ki laad lai luti wa ye ki u poi kylleiñ, wei najrong wa wanrah ko i khooid haka rymaw deiwa pynduna i pynmih tdem, ong u wa ka Cycle wanrah ko leh i myntoi hei chait i khiah u bru, yarap ko u lait nei ngat hei dih i baam wa boonjait wa kiwi kiwi.
Pynrap haroh u wa i rukom uiñke sawari daka Cycle ymtoh du ya ki bru baar jylla næ ki bar ri wa ye tangwa ki bru Pnar yong i leh ye hi ki u lai.
