Ka karkhana pynmih musla Organic wa heh dooh ha ka thaaiñ North East ka ri India kawa em ha Lumdaitkhla, Bhoirymbong kawa pynkrehkaam da ka Meghalaya Basic Management Agency wa ka Eastern Ri-Bhoi Organic Farmer Producer Company Ltd, da wan wai ka da ka Montri ka Muna Tangka wa Corporate Affairs ka sorkar India, ka Nirmala Sitharaman deiwa emlang u Montri Rangbah ka jylla Meghalaya, u Conrad K Sangma.
Da ya emlang leh wa u Montri Rangbah ka Sikkim, u Prem Singh Tamang Golay deilang ki Montri ka sorkar jylla wa ki MLA.
Ka Nirmala hawa e yei klam da yaroh ko ya u Montri Rangbah wa kiwa rep yeiwa stat ki wow pyrkhat jngai deiwa ong wa emkaam bha ya ki thaw pynrkhiang, ki thaw sait, ki thaw thaad, wow tylliat wei ini daw e myntoi ko ya kamwa 5500 ngut kiwa rep Organic.
Da pyntip ko leh wa kani ka karkhana toh kawa nyngkong dooh na ki Spice Processing Unit wa da yoh ya ka Certificate Organic hapaoh ka thaaiñ North East kawa da pynwandur yow pynmih hadooh 10,000 metric ton u musla Organic chi snem uwa ye u dai hei dor wa heh bha.
Kani ka karkhana toh kawa da chna hei lut wa Rs. 32 klur.
U Conrad hawa e yei klam da ong u wa ha ki phra snem wa da lai, hadooh 11 tylli ki Processing Unit da mih ki ha ka jylla wei da kyrchaan ya palat 5000 ngut kiwa rep wei da e myntoi hadooh 55,000 tylli ki manyung.
Kani ka karkhana toh neibynta u syiñ, chirmit, nai yong wa u sumurit wei kawa da yoh ya ka Certificate hapoh ka National Programme for Organic Production (NPOP) wa EU Organic Standards, iwa mut wa ki mar wa pynmih na kani ka thaw daw ye wow lai dai ki wot cha baar ri leh.
Discussion about this post