Ha i wym poipyrkhat wow jia wei kam chibynta wow yakhun yei wym khooid ki kasari, ka Bombay High Court da beh kreh ko ya ar ngut ki Senior District Judge nei thut i krehkaam ki wei i kreh ki da pynkut nadooh ka chi tarik uni u bnai.
Kini ki Judge toh u Dhananjay L. Nikam, District Judge-3 uwa man leh kam u Additional Sessions Judge ha Satara wa u Irfan R. Shaikh uwa jooh man kam u Additional Metropolitan Magistrate, Ballard Pier wei hadien won kam u Civil Judge (Senior Division) ha Palghar.
I chah beh kreh ki toh iwa ñiaar bha khamtam wa u Nikam da chah beh u nei baamtooh (Corruption).
Katkam ka FIR wa da ujor ha Satara, da pynbaad wa u Nikam lyngba ki ksiang da dawa u Rs. 5 lak wow pynlait jamin ya u Rajendra Holkar uwa chah kset hapoh Judicial Custody ha ki kaam pyrchah aiñ.
Hadien wa chah beh chipor (Suspend) u Nikam, ka HC da ong ko wa i leh u ktah bha i yei khooid ki kasari wei da beh kreh ya oo katkam ka Prevention of Corruption Act.
U Irfan R. Shaikh won da toh uwa thung yow bichaar ya ki mukotduma hapoh ka Narcotic Drugs and Psychotropic Substances (NDPS) Act, heiwa da chem wa oo leh toh uwa pynemkaam ya kini ki mar pynmuaid yeiwa da pyntikna da ka Pathology Test wa phah leh da ka HC.
U Shaikh da pynemkaam bakla u leh yei bor yong oo wow khang ya ki pulit wow Register Case ha i kaam tyrrah kari wa emkti u. Hadien wa chem yeini, ka HC da beh kreh ko ya oo neidaw wym yahap wow bah u ya ka lyngkor wow bichaar næ embynta u ha ki kaam aiñ.
Discussion about this post