Ynne ka sngi u kyrtong ka Congress na Mowkaiaw, u Nehemayah Tyngkan da thmu u wow pynman ya ka yalang yalap Election ha Yaaw Sahsniang hadien wa da yohbor u na ka Returning Officer kani ka Constituency wow pynman yalang nadooh 8:00 hadooh 10:00 waje i step.
Manda poi ka kari kit tanghæng ha Yaaw Sahsniang, neiliang ki waheh ka chnong Sahsniang da phah pyndam ki ya i sur Election wa da tem.
Hadien ini manda yaklam u Nehemayah Tyngkan wa ki waheh ka chnong, da phah pyndam ki ya kani ka yalang iwa da pynsñiawsih ya kiwa kyrchaan u Nehemayah.
Hawa yaklam wa u Nehemayah da ong u wa ynnin i miet da yaklam wa ki waheh chnong ka Sahsniang wei da pdiang ki wow pynman u ya ka yalang ha yaaw tangwa ynne won i step da pyndam ki ka deiwa e daw wa yow lait u mih awri neibhah u kyrtong ka NPP leh u man yalang u ha yaaw pyn hei sngi. Heiyatoh wa ini neiliang u Nehemayah da ong u wa ym em u wanrah paidbah u cha kani ka yalang lait noh du kajiak ki kari neibhah wa ym em poisa u wow wanrah paidbah kam kiwi ki kyrtong wot hajrong itæ leh ym ngait kiwa pynlai chnong.
Neiliang u Nehemayah da ong u wa da kyrpaad u ya ki wow chah du ya oo samen wow klam u pynsñiaw u cha ki paidbah hajrong ki thong yong oo tangwa ym chah hiwot ki wei da phah won wow pynman ya ka yalang cha Madan Rikanan iwa man i thaw iwa jngai na yaaw.
Hadien ini dei wym yohsa kiwa kyrchaan u Nehemayah wa ki umkhmat wa joo da pdiang ki wow dam u pynman ya ka yalang ha kani ka chnong.
