Le ngut kiwa chah suba kam kiwa lute bru da chah bom yong chnong ki heiwa ar ngut da dooh noh ki yei mynsien hadien wa chah ksoh ki ha kiwa chong chnong ka thaaiñ Rangsakona ha South West Garo Hills iwa da jia hei miet ka 3 tarik.
Ki pulit ka Garobadha Outpost hadien wa tip yeini da lai hiar ki cha ka chnong Jaluagre heiwa da chem ya ki paidbah kiwa kem ya ki le ngut ki bru wa suba toh ki nong lute wei kini ki bru toh kiwa da joor bha i mynsoo neidaw wa chah dat chah bom ki pyn ha rood sarok.
Ya kini ki le ngut da kit cha ka Garobadha PHC yow chah sumaar ki tangwa ar ngut na ki da khlaad noh ki. Wei kini kiwa yap da tip kam u Balen G. Sangma (30 snem) wa u Sken D. Shira (30 snem).
Uwa dang im toh uwa tip kam u Betuwel D. Shira (22 snem) uwa da kit cha Civil Hospital, Tura yow chah sumaar u.
Ha kani ka thaw wa jia da chem ya kawi ka kari Maruti 800 wa em Number AS-15-7176 wa pynemkaam da kini ki 3 ngut, u dieñ wa em snaam, ka wait, ki ID Card, ka poisa Rs. 1700, ka Seal yong u Chairman ka United Garo People Forum (UGPF), South Western Zone Ampati HQ Tura, ka kot wa em i pyrtuid kiwa ksoh kaam ka United Garo People Forum (UGPF), Ampati Zone, South West Garo Hills.
Ar ngut na kini kiwa cha dat chah bom toh kiwa da jooh chah kem ha ki pulit ha ki kaam wa yatoh wa i pynyap bru, i rahbor ya ki bru, i dawa poisa, i rah tiar yasiat wa kiwi de ha South West Garo Hills District.
Discussion about this post