Jowai: Katkam wa pyntip ki pulit ka West Jaiñtia Hills da ong wa ynne i step ka 15 tarik heipor kamwa 3:30 da yoh yutip ka PCR Jowai wa em i awri ha Hilltop Dhaba, Riat Turiem, Khliehtyrshi wei mar ya tip yeini ki pulit da lai ki cha kani ka thaw wow chem yeiwa sakhiat.
Hawa poi ha i thaw da chem wa uwi u pulit wa tip kam u Thmubait I Dhar chirup wa ki lok yong oo da dat ki ya ar ngut ki bru wa kynthup ya uwi na ri Bhutan wa uwi won na West Bengal.
Ya kini kiwa chah dat da tip kam u Passang Dorji, khon u Quota Dorji, na Phuntshongthang/ Bakuli, Samdrupjongkhar, Bhutan wa u Jity Kami, khon u I Kami, na T Chakraborty M.M Road, Subash Pally, Alipur District, West Bengal.
Kini ki ar ngut toh kiwa yah ya ki truck wa kit mooyong na Bhutan wei thmu ki wow lai cha Bangladesh. Ha waroh kini ki truck em ki phra tylli.
Ya kiwa dat ya ki da tipmit kam u Thmubait I Dhar, uwa man u pulit ka 3r Bn. uwa em wa ka SB Security Wing wei da thung ya oo kam u PSO (Personal Security Officer) yong u montri ka sorkar jylla, u Kyrmen Shylla.
Ya ki lok u Thmubait da tip kam u Chanky Lhuid (26 snem) wa u Deibormi Lyngdoh (28 snem).
Hei yaklam wa uwi na kiwa chalan moo (exporter) u wym kwah wow pynmih pyrtuid da ong u wa heipor wa chah takit yei mar wa kit kini ki truck ha ki le ngut, da khana ki wa uni u mooyong toh uwa na Bhutan wei dei langær kit moo ki cha Bangladesh wei heitæ kini ki le ngut kyntait ki yeini neibhah wym yoh u chalan mooyong ha Meghalaya wei da sdang awri ki ya ki wei uni u pulit (Thmubait) da pynemkaam u wot da ka tiar siat yong oo wow dat ya ki. Da pyntip leh wa heipor wa jia ini kiwa boon ki truck dang em ki ha luti wei dang wan ki nadien.
Chooh chooh uni u exporter da kam u wa kini ki truck da biang lut ki ya ki kot ki sla nadooh Customs, GST wa kiwi kiwi wei da lai luti hi-eh (Transit) lyngba ka Meghalaya.
Neiliang ki pulit da kem ki ya kini ki le ngut wei da yah ya ki hakhmat ka yung bichaar ynne ka sngi, wei ka takit dang man ko kawa lai chakhmat.
Discussion about this post