Kiwa na baar ri wa lai puræ ha Gujarat University, Ahmedabad da chah dat ki ha kiwa boon ki bru du neidaw wa leh Namaz ki Hapoh ka Hostel wa sah ki heiwa neiliang ka Ministry of External Affairs ynne da kular ko wa ka sorkar jylla daw pynchitom ko ya kiwa emkti.
Ini toh iwa da jia ynnin i miet heiwa kini kiwa lai puræ da yachem lang ki ha ka University Hostel yow leh ‘Taraweeh’, kawa man ka duwai Blai dei miet heipor ka Ramzan.
Neiliang uwa e ktien ka MEA, u Randhir Jaiswal da pyntikna u yeini wa jia wei da kular u leh wow pynchitom ka sorkar jylla ya kiwa emkti.
Da pyntip u wa uwi na kini kiwa mynsoo da yoh u wow mih noh napoh Hospital wei kiwa mynsoo toh arngut na ini wa jia.
Katkam wa khana u Police Commissioner ka Ahmedabad, da em kamwa 300 ngut kiwa na baar ri kiwa lai puræ ha kani ka Gujarat University wei ha ka Block A da em kamwa 75 ngut ki kiwa da ngooh Blai ynnin heipor kamwa 10:30 i miet heiwa da wan kamwa 20-25 ngut ki bru kiwa da pynkulmar kiwa kawang moo hadooh wa da chah ktah ki kamra kani ka Hostel.
Kini kiwa chah dat toh kiwa na Afghanistan, Sri Lanka, Turkmenistan wa ki ri kiwa na Africa.
Kini ki bru wa da wan toh kiwa da rah da ki dieñ wa ki tari wei da kbai ki leh ya ki kyntien Jai Shree Ram wei ki pulit da chah pynbaad ki wym em kem ya kini kiwa emkti heipor wa poi ki ha ini i thaw wa jia.
Discussion about this post