Kiwa chong chnong ka Langkyrding, Nongmynsong, Shillong da ujor FIR ki ynnin ka sngi ha Nongmynsong Out Post hajrong i chah thang ki skum e baam masi kiwa mantre da ki 3 ngut ki bru heiwa da wanrah i dooh nong wa boon bha iwa dapoi da ki lak tangka.
Ini toh iwa da jia hei miet ka 20 tarik uni u bnai heipor 11:10 heiwa da chem wa da em wa thang ya kini ki skum baam masi kiwa em ha ki ar tylli ki thaw kiwa jngai kamwa 100 meter uwi na kawi wei da thang ya kini da ki bru wym tipmit.
Kawi na kani ka skum baam masi toh kawa chongdor T. 2 lak kawa mantre da u B. Ray, kawi won wa chongdor T. 1.30 lak ka yong u C. Ray kawi won kawa chongdor T. 90,000 ka yong u U. Ray.
Chooh chooh da pyntip wa ka kari tympleh diñ dapoi ko du hapoh chiteiñ kynta tangwa chwa wow poi ki cha ini i thaw da em ki bru wa dat moo ki kini ki kari wei da pyrchang ki wow khanglaad ya kiwa tympleh diñ wow leh ki yei kaam yong ki iwa da wanrah yei dooh nong wa joor ya kini ki tre heiwa iwa dang sah kini ki skum da man ki leh ki wym hoi de u pynemkaam.
Da wan leh wow yarap da kiwa chong chnong wa ki dkhot ka dorbar chnong yow lait ini i diñ u poor cha ki trep masi kamjooh ki thaw sah ki bru.
Hadien wa dep tympleh ya ini i diñ wei da liwan ki bru cha jar jiar ki yung, da wan won sa ki bru wa riam dei rong yong deilang wa ki Mask kiwa da wan da kawi ka kari Bolero rong lieh ka wym em Number Plate kiwa da dat won ya kini ki bru wa em ha ini i thaw heiwa arngut kiwa da wan wow yarap yow pynran da chah dat ki wei da mynsoo ki malu mala.
Kamtæ da ong ha ka FIR wa kam kini ki jait da jia ki nachwa leh iwa da pynsier mynsien ya kini kiwa chong chnong iwa da yoo wa da man kamwa da em i pynkhreh chwa wow leh yeini yow tynjooh ya kini kiwa chong chnong kiwa maya yei suk i saaiñ ki wym embynta emkti ha iwon iwon wow pynthut ya ka imlang sahlang.
Hajrong ini da dawa wow kem ya kini kiwa emkti wow leh ya ini i kaam, u su ya ini wa dooh nong kiwa chah thang skum wei wow e yada ya ki mrad wa ri ki, i yung i sem wa kamjooh kiwa chong wa sah ha kini ki thaw.
