Kam chibynta wow yaleh pyrchah yei khayi drugs, neiliang ka State Anti-Narcotics Task Force (ANTF), Meghalaya, da pynman ko yei lai kynreh ha ka thaaiñ Pynthorumkhrah ka Shillong heiwa da yoh wow kem ya 40.12 grams i Heroin wa chongdor kamwa ₹7 lak.
Hadien wa da tip tikna wa em ki bru kiwa wan na Silchar, Assam cha Shillong yow lai e kti yei drugs, neiliang ka State ANTF da booh bru ko ha ki thaw wow psiah cha kani ka thaw wei da ksoh ya kawi ka thuk-thuk wa em Number ML-05-AD-1301 ha Pynthorumkhrah wa pynemkaam da ki ar ngut kitæ u Jamir Hussain Laskar uwa na Pangram, Cachar, Assam wa u Joy Ryntathiang uwa na Umkdait, Nongmensong, Shillong.
Hawa kynreh ya kini da chem soo tylli ki khieh sabon wa em Heroin hapoh wa khia 40.12 grams.
Ya kini waroh da kem ki wei da pynngat hapoh ka aiñ Narcotic Drugs and Psychotropic Substances Act, 1985 wei ka takit dang lai ko chakhmat yow chemdien ya kiwi de kiwa emkti ha ini i kaam.
Discussion about this post