Kiwa chong chnong ka Kalakhal Khasi Punji wa dang haap hapoh ka Kachudaram Police Station, Amraghat, Cachar District ka Assam kawa man ka chnong wa chong wa sah ki Khasi, ha ka 15 tarik uni u bnai da chah hiar thma ki ha ki Mia Muslim kiwa da rah da ka wait wa kiwi de ki tiar pynmynsoo.
Katkam ki FIR wa da e, ha katai ka sngi kiwa chong chnong ka Kalakhal Khasi Punji da lai ki cha ka thaw rep pathi kamwa jooh lai ki tangwa da wan ki bru wa tip kam u Salim, u Loti, u Kalamia, u Nur, u Mintu, u Abimulla, u Abdulrehman, u Rosit, u Ali, u Kalu Mia, u Soit Ahmed Mazumdar, u Bablu, u Sharul, u Lekai, u Amir San, u Alta Hussain wa kamwa 25-30 ngut kiwi kiwa man kam ki bru Mia Muslim kiwa da beh ya kini ki Khasi wa lai rep deiwa phah ya ki wow mih ki chisiendon, wei khlem daw da sdang ki wow dat ki da ki wait wa kiwi ki tiar wa nep wei da em leh kiwa rah suloi dei thmu wow pynyap ki kini ki wei kattæ da em kiwa dang chah sumaar ha Silchar Medical College & Hospital neidaw wa da joor mynsoo ki.
Da ong leh wa kini ki bru wa da pynmih pyrtuid deilang wa 25-30 ngut kiwi da maham ki wow thang yei chnong ki Khasi najrong wa maham ki leh ya ki khynnah kynthai wa lai skur wow slaitbor ki. Wei kattæ ki kam kiwa chong chonng ka Kalakhal ym nood de ki wow mih na chnong kamjooh ym nood de ki khynnah wow lai skur khamtam ki khynnah kynthai nei joor wa tieñ.
Da pyntip leh wa kini ki Mia Muslim toh kiwa emkti ha kiwa boon ki kaam pyrchah aiñ nadooh wow tooh wow lute, u khayi drugs, ki Yaba Tablet, u bhang wa kiwi de.
Uwi na kiwa mynsoo ha ini i jia toh uwa tip kam Raju Kassar uwa man u kurim ka Sibil Suchiang uwa da lai chei thaw rep deilang wa u Bikas Syngkor, u Adison Kasar, u Annias Rasmut, u Wiki Pohom, u Starly Lamin wei heipor wa chah thombor ki da yaleh ki wow yada ya idæ heiwa da mynsoo leh u Bikas.
Discussion about this post