Hadien wa da pynpoor ki bru ya i dur waka khubor chaphang uwi u bru wa chah dung ha Shillong, neiliang u SP ka East Khasi Hills ynne da pyntip u wa ki pulit nyngkong da tip ki ya ini hei step ka 19 tarik uni u bnai heipor 6:30 lyngba ka Civil Hospital wei da lai ki wow takit yeini.
Hei takit da chem wa uni u bru toh uwa tip kam u Zecharia Sohthiang (25 snem) uwa na Umsning wei da chah dung u heipor kamwa 3:00 waje i step ka 19 tarik ha Police Bazaar da ki 3-4 ngut ki wei da pynkit ya oo cha NEIGHRIMS yow yoh u yei sumaar deiwa synraan ki pulit oo.
Ha ka 20 tarik won da yoh ya ka FIR na kiwa ha-yung uwa chah dung wa da lai e da ka payu kynthai u ha Sadar Police Station.
Ki pulit da pyntip ki wa nadooh i step ka 19 tarik uwa chah dung da khana u chibet deiwi chibet deiwi nadooh i thaw wa jia ya oo kamjooh i por wa jia.
Katkam wa da chem ki pulit, uni uwa chah dung da ku yabor u hapoh kawi ka kari ki bru samen ha Khyndailad ha ka 18 tarik heipor kamwa 9:45 i miet wei da paan yarap u na ki soo ngut kiwa em hapoh kari yow yarap lai thooh ka ka Scooty u deiwa kam wa chah tyrrah u ha Mawprem. Manda poi ha Mawprem, u Zecharia da phla u ha kiwa em hapoh kani ka kari wa da chah dung u wei wow sñiawbha ki wow lai booh oo cha i yung wai wa sah u ha Mawshbuit kawa dang haap hapoh ka Madanriting Police Station. Kini ki bru da poi ki ha Mawshbuit heipor kamwa 12:30 i step synyaaw ka 19 tarik wei da ekti ya oo cha kiwa ha-yung ha-sem yong oo.
Heipor 3:59 i step won, kiwa ha-yung u da Phone ki ya ka EMRI yow paan Ambulance wei da kit ya oo heiwa da poi u cha Civil Hospital heipor kamwa 5:30 i step deiwa emlang arngut kiwa ha-yung u.
Ynne ka 21 tarik won, u Zacharia da khana u wa da chah dung u ha kawi ka kynthai wym tipmit u hajan Hotel Pegasus tangwa lada yoo biang u ka dang kynmoo hi u yei dur ko.
Ki pulit da pyntip ki wa dang lai chakhmat ka takit yow chem ya kani ka bru wa emkti.
