Shillong: Kam chibynta ka Chief Minister’s E-Champion Challenge 2019 da pynman yaka Boot-Camp waka Pitching Session neibynta ki 100 ngut ki Entrepreneurs kiwa da chah jied yow tip ki kammon wow tyrwa wow pynbna ya ki buit yong ki kawa pynman daka Meghalaya Institute of Entrepreneurship (MIE) kawa pynman ynne ka sngi ha Shillong.
Ha kani ka Boot-Camp kawa ar sngi da wan chimbynta da u Dr. D. Vijay Kumar, Commissioner & Secretary Planning Department & Director General, Meghalaya Institute of Entrepreneurship (MIE), u B. Mawlong, Director, MIE, kiwa sikai na Indian Institute of Management-Calcutta Innovation Park (IIM-CIP) wa kynthup ya C. D. Mitra, Kaustav Majumdar, Prajal Konwar wa Debarpratim Das, wa kiwa mihkhmat naka Meghalaya Basin Development Authority (MBDA) nalor kiwi kiwi.
U Dr. Vijay Kumar hawa e u yei klam yong oo da ong u wa i thong wa pynman ka sorkar jylla ya kani ka yakob toh wow thap hei pyrkhat yei myllien wow seiñ khih hapyrdi ki khynroo khyllood hapoh ka jylla. Hadooh 63% hapoh ka jylla toh kiwa hapoh 34 snem, kawa man kawi na kawa heh dooh hapoh ka ri, kamtæ u Dr. Kumar da ong u wa ka Institute of Entrepreneurship yaleh ko katwa ye yow chim kabu ya i chit mynsien ki khynroo khyllood wei wow sumaar sukher ya ki buit yong ki deiwa e ya ki yaka rynsan wa ye ki u heh san.
Da pyntip u leh wa kam kiwa seiñkhih ka sorkar chimkhia ko ya ki neibhah ki em ki ka bynta wa heh yow pynku yaka Meghalaya.
Kani ka Boot Camp u kut ko haka 18 tarik heiwa kiwa da chah jied daw yoh ki wow pynsñiaw ya ki buit seiñ khih ki hakhmat kiwa bichaar.
Discussion about this post