Jowai: Ka sorkar u Modi ha kani ka dorbar tlang ka Parliament ka wow sdang nadooh ka 18 tarik uni u bnai hadooh ka 13 tarik u Kmaichonglad (Dec) uni u snem, daw pynrchang biang ko wow wanrah yaka Citizenship (Amendment) Bill 2019 ka wow e laad ya kiwi ki bru wa man Christian, Buddhist, Hindu, Sikh, Jain wa ki Parsi lait noh na ki Muslim kiwa em wa ki ri wa marjan waka India kam ka Bangladesh, Pakistan wa Afghanistan yow man ki kam ki tre ri wa pura ka India lada yut ki na ki ri yong neidaw wa chah thombor ki.
Ya kani ka Bill da pyrchah ha waroh ki jylla ka thaaiñ mihsngi heiwa ha Assam ka All Assam Students’ Union da pyrchah ki ya kani ka Bill wa pyrchang ko wow pynman tre ri ya kiwa ym toh ki Muslim kiwa wan psiah cha India hadooh ka 31-12-14 kawa da pynyinsur ya ka u snem 1971 kawa da ya mynjur hapoh ka Assam Accord.
U RTI Activist u Akhil Gogoi uwa yahkhmat leh yaka Krishak Mukti Sangram Parishad da ong u wa lada krehkaam kani ka Bill daw ku i boon ki nong Bangladesh hapoh Assam cha ka 1.9 Klur, deiwa ong leh wa kani ka Bill daw ktah joor ko yaka jylla Assam waka Tripura.
Neiliang ka North East Students’ Organisation (NESO) ka chatri ka seiñ All Assam Students’ Union (AASU), Twipra Students’ Federation (TSF), All Arunachal Pradesh Students’ Union (AAPSU), All Manipur Students’ Union (AMSU), Khasi Students’ Union (KSU), Garo Students’ Union (GSU), Mizo Zirlai Pawl (MZP) waka Naga Students’ Federation (NSF) da pynbna ki wow pynman yaka yakhih ha waroh ki nongbah ki jylla ka thaaiñ mihsngi ha kani ka 18 tarik yow pyrchah yaka Citizenship Amendment Bill.
Ka NESO da ong ko wa i dawa yong ka toh wow pynkrehkaam ya ka ILP ha waroh ki jylla ka North East.
Ha Assam ka yakhih da sdang ko da ka Asom Jatiyabadi Yuba Chhatra Parishad (AJYCP) kiwa da pynman ya ki Rally wa ki chong kyllaiñ myngor deiwa pynbad leh yaka sorkar Assam kawa yahkhmat da ka BJP wa man ko pyrchah yaka Assam wow wanrah ya ki Hindu iwa daw pyndooh jait ya ki tre ri tre chnong.
Discussion about this post