Ka lympung yalehke Jaiñtia Hills District Chess Competition cum State ‘B’ Tournament 2024 wa pynman da ka Jaiñtia Hills District Chess Association (JHDCA) kawa da sdang ynnin ka sngi ha Thomas Jones Synod College, Jowai da poi ko cha wakut ynne ka 8 tarik.
Ynne da em ka yalang heiwa u District Sports Officer ka West Jaiñtia Hills, u K. Passah da man u kam u kongsan.
U P. Lhuid, uwa man u President ka JHDCA hawa e i klam ynne da ong u wa lyngba kani ka lympung daw jied ya ki 6 ngut wow mihkhmat ya ki District ka Jaiñtia Hills cha ka State Championship ka wow man nadooh ka 12 hadooh 15 tarik uni u bnai ha Tura.
U K. Passah hawa e yei klam da e khublei u ya ka seiñ JHDCA kawa da pynman ya kani ka lympung neibhah kani ka yalehke toh kawa pynproh ya i jabieñ ki bru.
Da ong u wa ka Meghalaya da ku bha ko heiwa ha u snem wa dadep da ye ko u pynman ya ka lympung International Level ha Shillong.
Chooh chooh da pynchlur u ya ki khynnah wow yaleh Chess ki ym du wa ki lok tangwa ha ki Phone wa ki Computer leh kamjooh deiwa kyntu ya ki manbei manpa wow pynchlur ya ki khon yong ki wow yaleh Chess wei wow chimbynta ki ha kam kini ki lympung.
Ha kani ka sngi da e sñiawbha leh ya ki Prize cha ki ar ngut ki kynthai kiwa da chimbynta ha kani ka lympung kamjooh ya ki khynnah kiwa hapoh 13 snem wa kiwa hapoh 17 snem i rta.
Kiwa jop ha kani ka lympung ki wow lai mihkhmat ya ka Jaiñtia Hills man ki kamni ha wah:
Ha ka Open Category- U Roben Suting, u Dapmon Bang wa u Elangki Rymbai.
Ha ka Under 17 Category- U Zephaniah R Dkhar, u Braxton Ryan Lamare wa u Leon Raymond Rymbai.
Discussion about this post