Man ko ka khubor wa kmen wa yoh mynsien heiwa ka Ephatha Society kawa em ha East Jaiñtia Hills kawa man ka seiñ kreh monsñiawbha kyrpang ya kiwa tymbuiñ wa duna ha i doh i pran (Differently Abled Persons) da yoh ko u lai chimbynta ha ka International Purple Fest.
Ka Society da phah ko ya uwi u khynroo, u Health Tlang hadien wa da pyndep u ya i chah sikai ha i soor wa i thaiñ (Tailoring & Knitting) na ka Ephatha Society Inclusive Training.
Ka International Purple Fest toh kawa da pynman ha Goa nadooh ka 9 tarik hadooh 12 tarik uni u bnai.
Ya ini i chah jied da toh deiwa tyrwa da ka State Resource Centre on Disability Affairs, Civil Hospital Shillong, ha i krehlang wa ka PRIME Meghalaya.
I mut kani ka Purple Fest toh wow yoh u pynyoo pyrthai ya i sap wa kyrpang yong kiwa tymbuiñ duna khnang wow yoh u pynchlur ya ki wei wow yachem wa kiwi kiwa seiñ kreh (Entrepreneur) na kylleiñ ka pyrthai khnang u yoh buit ki u pynku ya i kaam i kamai yong ki.
Ha kani ka Purple Fest da emlang wei da synraan ya ki 7 ngut ki PwDs napoh Meghalaya da ki heh sorkar na ka Commissioner for Persons with Disabilitie, ka Bridget Warshong, ka Deputy commissioner for Persons with Disabilities, ka Ripaia Passah; Assistant Commissioner for Persons with Disabilities ka Social Welfare Department Goverment of Meghalaya, napoh State Resource Centre, Shillong wa napoh PRIME, Meghalaya.
Discussion about this post