Ka Directorate of Sports & Youth Affairs ka sorkar Meghalaya da e khublei ko ya ka Junior Boys (U-17) ka Myngken Christian HS School, Ri Bhoi District kawa da chah khut wow chimbynta ha ka 2nd Indo-French Football Tournament kawa daw pynman ha Paris, France kawa pynman da ka Subroto Mukherjee Sports Education Society.
Neiliang u Montri Rangbah ka jylla, u Conrad K. Sangma da ong u wa ngait skem u wa i chit mynsien ki khynroo yong i khamtam ki khynnah ka Myngken Christian H.S. School kiwa da pynyoo yei sap yong ki hapoh ka ri wei kattu da mihkhmat ki ya ka ri yow lai cha ka sor Paris kawa dang dep pynman ya ka Olympics, daw man kam ka nongmuna ya kiwi wow bood ki.
Ka Myngken Christian HS School da rem ki ha ka Final ka 63rd Subroto Cup International Football Tournament kawa dang dep pynman ha Bengaluru. Wei neiliang ka Subroto Mukherjee Sports Education Society da yoo ki yei sap yong ki, kamtæ da khut ko wow embynta ha kani ka Tournament.
Neiliang won u Montri ka chnat Sports and Youth Affairs, u Shakliar Warjri da ong u wa kiwa yalehke da dep ki wow pynyoo yei bor ki ha kani ka 63rd Subroto Cup wei kattu da man i sarong ya ka jylla wa daw yoh ki wow ku cha ka rynsan kawa cha baar ri, kamtæ da pyn-eh-daw u ya ki wei da kular u leh wow e yei kyrchaan neiliang ka sorkar.
Kani ka Tournament toh kawa daw pynman nadooh ka 25 hadooh ka 30 tarik u Khonchonglad (Nov), 2024 wei yei lut i sep daw pyndap da ka sorkar wei waroh kiwa yalehke da em ki 16 ngut wa kynthup ya ar ngut ki Goalkeeper, u Coach, u manager deilang wa uwi u wow mihkhmat ya ka jylla.
Discussion about this post