Jowai: Ka chnong Raliang, ka chnong kawa em ha luti wow lai cha Mowkaiaw, West Jaintia Hills District, da chah jied ko ha ka sorkar India kam ka Digital Village wa nyngkong dooh ha West Jaiñtia Hills District. Ha Meghalaya em 11 tylli ki Digital Village.
I yoh yei naam Digital Village, mut wa ka chnong ka wow pynkrehkaam bait da ki Computer ha kiwa boon ki liang næ ka e-Governance, kawa ki paaid chong chnong u pynemkaam bait ki da ka Internet ya kiwa boon ki bynta.
Deiwa chah jied kam ka Digital Village, ka sorkar u kyrchaan ko ya kani ka chnong deiwa e ya ki sikai pynemkaam Computer wa mynkna, neitæ i booh ya ki Wi-Fi Network, i thap Form Online, i krehkaam ki Bank, ki Solar Light LED, i sikai skur lyngba ki Digital Technology wa kiwi kiwi de ki kaam lyngba ki Common Service Centre (CSC).
Neiliang ka sorkar pyrdi ka da booh thong ko wa ha i chi snem, lyngba ka Ministry of Electronic and Information Technology u jied chi lak tylli ki chnong wow pynkylla kam ki Digital Village ha ri India. Ya ka Raliang da jied dei ya krehlang wa u Pyndap Lamare, Village Level Entrepreneur (VLE) yong ka Digital Seva E- Governance CSC Raliang.
Ini i chah jied ka chnong, da pynkmen ko chiboon ya ki paidbah yong ka chnong kiwa da pynman ya ka yalang ynne ka sngi kam ka dak wow wai ya kani ka Digital Village wei ha kani ka yalang da yoh ya i klam na u S. Sanki Lamare uwa man kam u waheh chnong ka Raliang uwa man leh u Chairman ha kani ka por wei da yoh leh yei klam naka N. Shylla kawa man leh ka Branch Manager yong ka SBI, Raliang Branch, u Joshwa Lyngdoh, State Head yong ka E- Governance CSC, ka Ameecia Pariat District Manager E- Governance CSC wa na u Pyndap Lamare uwa man kam u VLE yong kani ka chnong. Da emlang leh ka Morngait Lyngdoh VLO yong ka SHG, Block, u Chawas Lyngdoh uwa man kam u Dolloi wa kiwi kiwi.
Discussion about this post