Chwa wa ki khon khynroo khyllood wa lai puræ ka West Jaiñtia District u mih ki ynne ka sngi na Jowai yow lai yachem ya ka President ka ri India ha nongbah Delhi wei wow sakhi leh yaka Winter Session ha Parliament, lyngba ka Exposure Trip wa da pynkhreh da ki bor District ka West Jaiñtia Hills, neiliang u Montri ka chnat Sports & Youth Affairs ka sorkar jylla, u Wailadmiki Shylla da yachem yaklam u wa ki ynne hi ka sngi ha Conference Hall u Deputy Commissioner ha Jowai.
Kini ki khynroo khyllood wa da chah jied wow lai yachem ya ka President ka ri toh kiwa da jied kyrpang lyngba i ye ki u poi chakhmat ha ki jait yakob waphær waphær wa da pynman da ka yung krehkaam u Deputy Commissioner ha ki bnai wa dadep, wei waroh da em ki 17 ngut.
Ha kani ka yachem yaklam wa u Montri, da emlang leh u DC ka West Jaiñtia Hills, u Abhinav Kumar Singh, ka SDO Sadar Jowai, ka Vevotolu Kezo wa u F. Passah, Assistant Commissioner.
U Wailadmiki Shylla hawa klam da yaroh u ya u DC hajrong i ye u wow pynmankaam ya kani ka thong wei yaroh u leh ya ka SDO Sadar kamjooh waroh ki kiwa sikai skur kiwa da embynta u e mynsien ya ki khynnah skur wow chimbynta chitrhem.
U Deputy Commissioner da ong u ya kani ka luti da chim u toh lyngba i e buit u Wailadmiki Shylla neibynta u yoh laad ki khon khynroo khyllood u sñiawthooh ki rap bha ya ka mynried ka wow yarap leh ya ki u sñiawthooh ki yei bor yong ki hi.
Ha kani ka Exposure Trip najrong wa yohlaad ki u yaklam yachem wa ka President ka ri, daw yoh ki leh u lai cha Rashtrapati Bhavan, ki Museum, ki thaw yong rim ha Delhi, u lai sakhi leh ya ka Winter Session yong ka Parliament wei wow lai pait ya ka Nehru Planetarium.
Yei bai lai bai wan wei thaw sah da pynlut da ka yung krehkaam u DC wei daw liwan ki ha ka 13 tarik uni u bnai.
Discussion about this post