Ka Bengaluru FC da jied ko ya ar ngut ki khynnah kiwa na West Jaiñtia Hills District wow man kam kiwa yalehke wei wow chah pynpliah hapoh ka chlem e sikai kani ka Football Club kawa em ha Bengaluru hi.
Kini ki arngut toh u Givenson Suting (U-15) uwa lai skur ha North Liberty HS School wa u Avidrian Lato (U-13) uwa lai skur ha Jowai Public School kiwa da chah khut nyngkong wow lai chimbynta ha ka Final Trial wa da pynman da ka Bengaluru FC ha Bengaluru ha ka tayaw wa nyngkong uni u bnai kawa da pynman 3 sngi.
Kini ki ar ngut kiwa na Jowai da man ki kam chibynta ki 10 ngut kiwa da chah jied na Meghalaya yow lai chimbynta ha ka Trial ha Bengaluru wei da man ki du ki kiwa chah jied heiwa na kini ki 10 ngut, 5 ngut toh kiwa na West Jaiñtia Hills District.
Kini ki ar ngut toh kiwa da chah sikai ha ka Power Soccer Academy (PSA) kawa na Mynthong, Jowai deiwa ya krehlang waka Advance Grassroot Centre ka yung krehkaam u DSO wei hadien wa wan ka Bengaluru FC ha Jowai da yoo ko ya kini wei da khut ko ya ki wow lai chimbynta ha ka Trial wa da pynman ha Bengaluru.
Ha Jowai ya kini ki ar ngut da yoh ki yei sikai na u Amity Tongper wa u Milan Lynrah kam ki Coach.
U Givenson wa u Avidrian kattu u yoh ym du i pynpliah hei yalehbol tangwa wot ka puræ puthi leh daw pynlut da ka Bengaluru FC ha Bengaluru.
Kam wow pynkynmoo wa ka Bengaluru FC toh kawa da jop ya ka ISL la le sien.
