Hadien wa ini wa dep da pynkrehkaam da ka Section 144 CrPC ha Shillong heiwa da phah liwan yung ki ki bru hapoh 10:00 waje i miet neidaw wym man chngaaiñ de i lai i wan wei da chim leh ya ka rai hadien wa da pynman ya ka yalang wa u Symbood Montri Rangbah uwa pait leh ya ki kaam pohyung, u Prestone Tynsong wow pynjoor yei uiñ sonteri ki pulit ha kiwa boon ki thaw yow pynkhooid ya kiwa boon ki kaam wa da pynsih pyrtuid ya ka Shillong.
Kamtæ u SP ka East Khasi Hills District da pyntip u wa ki pulit da lai kynreh ki ha kiwa boon ki thaw deiwa yarap ki Meghashakti (Women Police Commandos) ha Motphran, Paltan Bazar, Mawblei, Nongrim Hills, Laitumkhrah Bazar, Mawlonghat, Urkaliar, Upper Shillong, Polo, Mawbah, Jhalupara wa Upper Mawprem wei da yoh kem 1,12,097 ml i kiad pharæng wa7,74,000 ml i kiad lieh du ha ka 14, 15 wa 16 tarik uni u bnai.
Chooh chooh da pyntip wa ki pulit wa uiñ sonteri dei kjat da pynjoor bha ki ha ki thaaiñ Khyndailad yow kem ya ki kynthai kiwa lai dakait kiwa dai ya idæ iwa man ym du pyrchah ya ka aiñ wei iwa da wanrah yei kulmar da boonsien. Heiyatoh wa ini da pynngat ya ki hapoh ki kyndon ka aiñ Immoral Trafficking Prevention Act wei kini ki kynthai wa chah kem da em ki 15 ngut wei da lai chakhmat katkam ka aiñ pyrchah ya ki.
Ki Shillong Traffic Police won da kynreh kari ki step wei sngi ha kiwa boon ki thaw yow kem ya kiwa yah kari deiwa muaid, kiwa yah thuk-thuk khlem sap Helmet, kiwa pyndait Silencer da kiwa ood, kiwa pyndait da ki yit wa doom ha ki kari wa kiwi de kiwa man pyrchah ya ka aiñ MV Act. Heiyatoh wa ini ha kani ka tayaaw wa da dep, da chah kem 277 tylli ki kari wei ka kuna wa da mih na kini dapoi ko T. 2,36,500.
Discussion about this post