September 8, 2020

Chah kem 3 ngut ki nong Nigeria na Thlumuwi, West Jaiñtia

Advertisement ad1

Ki pulit ka West Jaiñtia Hills ynnin ka 7 tarik da ksoh ki ya kawi ka kari Maruti Alto 800 ha Thlumuwi kawa haap hapoh ka Amlarem Sub-Division kawa lai cha Shillong.

Manda sylli ki ya kani ka kari da chem wa em 3 ngut ki nong Nigeria napoh yong ka ya kiwa suba da wan ki na Bangladesh khlem ki kot ki sla.

I takit ya kini ki le ngut ki nong Nigeria dang pteiñ i wei da phla ki wa da yoh yarap ki leh na ki soo ngut ki tre jylla wa ki tre chnong ka thaaiñ.

Na kini ki soo ngut uwi toh u na Damsite Block-II, wa le ngut na chnong Umladkhur wei da kem leh ya ki katwa uwa yah kari toh uwa na Pynthorbah, Shillong.

Kam wow pynkynmoo heini ha u 2019 da em boon ngut kiwa na Africa khamtam na Nigeria kiwa da chah kem ha Ri-loom Jaiñtia hadien wa da psiah tooh ki chapoh ka ri khlem kot ki sla.

Ya kini ki le ngut ki nong Nigeria wa da kem ynnin, da pynngat ya ki hapoh ka aiñ Foreigners Act ka ri wei i takit dang lai i chaphrang.

Kini ki nong Nigeria toh u Okoye Christian Nonso (20 snem) uwa na Oroma-Etti-Anamera, Nigeria, ka Nwacimiere (29 snem) na Ogutatuo, Nigeria waka Agukwendu Stephanie Uchechi (25 snem) na Negbidi Emo, Nigeria.