Katkam wa pyntip ki pulit, ha ka 9 tarik uni u bnai da em kawi ka thuk-thuk Pulsar kawa da chah tooh na chnong Laitsohpliah, Sohra wei hawa takit ki pulit da em wa pyntip wa ya kani ka thuk-thuk da em wa yoo ka hajan Mairang.
Kamtæ ki pulit ka Sohra da lai ki cha Mairang wei deiwa yarap ki pulit ka Mairang da yoh ki wow kem ya kani ka thuk thuk heiwa da yoh leh wow kem ya arngut ha Mairang kiwa da phla wa da em boon tylli ki thuk-thuk wa da yoh ki wow tooh na Shillong hapoh i yahkhmat uwa na Nongsohma, Eastern West Khasi Hills District.
Ha ka 18 tarik won heipor 9:00 waje i miet ki pulit ka Sohra da lai ki cha chnong Nongsohma deiwa yahluti uwi na kiwa chah kem heiwa da yoh wow kem ya u heh kini na chnong Nongsohma uwa da phla leh yei emkti u wow tooh ya ki thuk-thuk na Shillong deiwa emkti leh kiwi.
Deiwa phla uni, ki pulit da yoh ki wow chem ya ka wi ka Scooty wa artylli ki thuk-thuk ha ka jooh ka miet wei ha ka step wa boon won ki pulit ka Sohra deiwa yahkhmat u OC Inspector Pynhunlang M. Syiem deilang wa u Inspector Phrianglin Syiem I/C Nongthymmai BH, u SI Stephen Nongspung IO kani ka Case wa ka Special Cell Team na Shillong da yoh ki wow kem sa 11 tylli ki thuk-thuk na chnong Nongsohma.
Da chem leh ya kawi ka karkhana heiwa kini ki thuk-thuk wa chah tooh da pynkylla ya ka Registration Number Plate deiwa pyndait da kiwa chna thok wei kani ka karkhana toh kawa da chem ha dong Nongkrem ka chnong Nongsohma.
Waroh da yoh wow chem biang ya 15 tylli ki thuk-thuk wa kynthup ya kawi ka Scooty wei kiwa da chah kem da em ki le ngut.
Ka takit dang lai ko chakhmat yow chem ya kiwi kiwa emkti ha ini i kaam.
