U President ka Hynniewtrep Youth Council (HYC), u Robertjune Kharjahrin da kyntu u ya ka seiñ Hynniewtrep National Liberation Council (HNLC) wow kynthup ha ki mat yaklam wa ka sorkar India ya i dawa pynkrehkaam ya ka ILP ha Meghalaya.
Ka HNLC kawa man ka seiñ kieñ suloi na Ri-loom Khasi Jaiñtia kawa em hapyrdi i klam yasuk wa ka sorkar India wa kamjooh ka sorkar jylla katni. Neiliang u heh ka HYC da kyrpaad ko ya ka HNLC wow kynset ko ya ka mat ILP ha i klam yasuk kamwa da leh ki seiñ kieñ suloi ka Mizoram wa Nagaland ha i por wa klam yasuk ki wa ka sorkar.
U Robert da ong u wa neipor cheipor ka HNLC toh ka wi na ki seiñ wa kyrchaan bha ya i yakhih dawa pynkrehkaam ILP, wei neiliang ka seiñ ha kani ka kynti kwah ko wow kyntu ya ka HNLC wa kamwa da kyrchaan ya ini i dawa ha ki por wa dadep, lyngba ini i klam yasuk ka seiñ kyrpaad ko ya ka HNLC wow kynset ya kani ka kaam ha ki mat yaklam.
Da ong u wa lada ka HNLC yarap ko wow kynrong ya kani ka mat yong ka jaitbru, ka seiñ yooluti ko wa ka Ministry of Home Affairs (MHA) daw ap ko, wei ini ym yohnong du ya ki dkhot ka HNLC tangwa ya ka jaitbru hi leh waroh kawi.
Ha iwi i liang u heh ka HYC da ong u wa hanla toh i klam yasuk iwa khlem booh kyndon, tangwa ymye wow klam yasuk khlem em ki mat. Da ong u leh wa i klam yasuk ka HNLC wa ka sorkar India ymtoh i wow wan pyndem (Surrender) donhi, tangwa i wan wow klam sñiawthooh yumut neibhah i yaphær yumut hapyrdi ka HNLC wa ka sorkar India toh ha i liang i synchaar næ Political Issue wei ini emkaam i yei yaklam hapoh ka synchar khadar namo ka Political Dialogue.
U Robert da ong u wa i klam yasuk toh deiwa pynchong yurim ya ki dawa yong i hok ka jaitbru wei iwi na i hok wa kyrpang toh i hok wow neh wow synchaar wei mantre hapoh ka thaaiñ, wei ka ILP embynta bha ko wow yada ya ka jaitbru na kiwi tawon ki jaitbru.