Ki pulit ka Guwahati ynnin da kem ki ya ki bru tooh kari ha ki thaaiñ khappood ka Meghalaya wa Assam kiwa kynthup ya kiwa na West Jaiñtia Hills.
Nyngkong da yoh wow kem ya kiwa da myllien yeini i kaam wei kiwa da tipmit chwa ki pulit wa kynthup ya u Md. Abdul Hanif Seikh (32 snem) uwa na Jhograpar, Dhubri District, u Md. Rafiq Ali (30 snem) na Arikati, Kamrup District wa u Md. Jakir Hussain (27) na No.2. Seshara, Barpeta District.
Ya kini da yoh wow kem deiwa tip tikna ki pulit na Gorchuk Police Station wa ka Special Operations Group (SOG) ka West Jaiñtia Hills District yei em kini ki damok tooh thuk-thuk.
Hadien wa phla kini ki le ngut da yang khap ya kiwi tawon ha Jowai, heiwa da yoh kem ya le ngut kiwa emkti ha ini i kaam tooh heiwa da chem leh ya ar tylli ki thuk-thuk Yamaha R15.
Kini kiwa chah kem toh u Deibormi Amrynsong (26 snem) na Kharkhana, u Tunadahun Matra (25 snem) na Karkhana wa u Rimiki Suchiang (22 snem) na Saphai kiwa na West Jaiñtia Hills waroh.
Hawa pteiñ yei takit da yoh leh sa 3 tylli ki thuk-thuk wa chah tooh kiwa da chem ha thaaiñ Muktapur-Karkhana wa em ha khappood Bangladesh kiwa 2 tylli ki Royal Enfield wa em Number AS-01FJ-7567 wa AS-01FE-3496 wa kawi ka Bajaj Avenger wa em Number AS-01DU-2357.
Na kini da yoh ya ki tiar kam ki Master Key, ka kharat ah naar wa kiwi dei ki tiar deilang ka poisa.
Kini ki bru toh kiwa kreh ha khappood Assam-Meghalaya heiwa boonsien ya ki thuk-thuk wa tooh da dai cha Bangladesh.
Discussion about this post