U Chief Executive Member (CEM) ka Khasi Hills Autonomous District Council (KHADC), u Pynïaid Sing Syiem da ong u wa heipor wa kreh ya ki kaam neibynta ki paidbah ymtoh wow wanrah ya ka seiñ kawa em ki.
Da ong u wa kam kiwa mihkhmat ki ym em mih ki neibynta kawon kawon ka seiñ wa em ki, tangwa da mihkhmat neibynta ki paidbah, neibhah wa ka seiñ ye ko wow yatoh du heipor Election yow yoh ya ka chap tangwa waroh san snem i krehkaam toh neibynta ki paidbah.
Ini i klam u Pynïaid toh hawa kylli hajrong i chah pynbor ki MDC ka Congress wow mih noh nei ya krehlang ka Executive Committee wa yahkhmat ka NPP.
“I yoo i yei chah pynbor ki MDC ka Congress kiwa ya krehlang wa i, yei kaam yong kiwi ki seiñ saiñpyrthai nga ym em O iyi iyi wow ong, tangwa nga pynkynmoo O yei sñiawkhia hajrong kani ka khubor neibhah ha ka yakrehlang da leh chiboon ki kaam neibynta i myntoi yong ki paidbah wa ka synchaar khadar”, da ong u CEM.
Da ong u wa heiyatoh u MLA/MDC wa ki seiñ saiñpyrthai toh du heipor Election neibhah man ko dei wow tipmit ya ka chap khnang wa ki paidbah u tipmit ki kammon wei ya uwon wow jied.
“Ya ka rai wa ki MDC ka Congress daw chim leh nga ym em O iyi iyi wow ong næ wow pynbor ya ki wow neh”, da ong u.
U Pynïaid da ong u leh wa ymtoh wow wanrah ya ka seiñ hawa kreh kaam paidbah, deiwa pynsñiaw leh wa toh u booh chwa yeiwa emkaam wa i eh ki paidbah hakhmat, wei kam ka seiñ won toh u wan ko hadien.
U Pynïaid da ong chooh chooh u wa i ya krehkaam waroh san snem toh bait wa ki paidbah, ym waka seiñ.
“I mihkhmat i neibynta ki paidbah, ymtoh deiwa mihkhmat neibynta kawon kawon ka seiñ. Kam kiwa mihkhmat i toh u sñiawthooh yei yatoh yong i wa ka seiñ wa toh du heipor ka Election”, da ong u CEM.
Discussion about this post