Hadien wa mih ka khubor wa sdang pynlang paaid biang ki dkhot ka GNLA, neiliang u SP ka North Garo Hills, u Bruno A Sangma ynne da pyntip u wa da kem hadooh 3 ngut ki bru wei da em 7-8 ngut kiwa emkti ha ini i pynlang paaid.
U Sangma ha Shillong Police Headquarter da pyntip u wa i takit dang lai i chaphrang wei ym ieh ya kiwa emkti ha ini i kaam.
Ha ka 7 tarik u Thohlakhmi (Feb), ha ki Social Media da mih ka khubor wa pynlang paaid ki dkhot warim ka GNLA wei ha ka 24 tarik won ki pulit da yoh ujor ki ha Kharkutta PS heiyatoh wa i dawa poisa wei neitæ sdang ini i takit.
U SP da pyntip u wa ki 3 ngut wa chah kem toh u Singsan K Marak (40 snem) uwa na Resubelpara, u Tilja Sangma na Adokgre (40 snem) wa u Surya Sangma na Adokgre (32 snem). Da ong u wa katkam wa man katni i takit dang lai i chaphrang wei da chim leh ya ki Mobile Phone yong kini ki 3 ngut.
U Singsan Marak toh u damok wa da pyndem suloi wei toh uwa emkti bha ini i kaam ha North Garo Hills wei da kwah ya oo da ki pulit ka Assam wa ka kasari ha Assam wei daw e kti noh ya oo ha ki pulit ka Assam.
Heiyatoh wa ki tiar yaleh da ong u SP wa da chem ya kiwa boon ki tiar wa da murieh da ka GNLA na Williamnagar.
Discussion about this post