Ki pulit ka East Jaiñtia Hills ynnin ka sngi da yoh yutip ki wa em ki nong Bangladesh kiwa da psiah tooh chapoh India khlem Passport wa Visa kamtæ da pyntip cha u SI Swer, IC ka Infiltration Check Post Umtyra wow yang ya kini ki bru.
Heipor kamwa 5:30 i janmiet kawi ka kari kamai kawa em u No. ML 11 5376 da ksoh ya ka ha Umtyra Infiltration Check Post heiwa da chem ya 5 ngut ki bru wei uwa yah ya kani ka kari toh u Warif Uddin Laskar da e u ya ka ID yong oo wow pyntikna wa toh u bru na India.
Ki 4 ngut won ym em biang kot biang sla ki wei da phla ki wa toh kiwa na Bangladesh kiwa da psiah tooh cha India lyngba ka chnong Dona.
Kamtæ da kem ya ki wei da kit ya ki cha Khliehriat PS wei da pynngat ya ki ha ka Foreigners Act wei ya kini ki soo ngut da tip kam u:
- Bhar Uddin, 46 snem na ka chnong Barkewon, District – Syllet
- Kamil Ahmed, 28 snem na ka chnong Barkewon, District – Syllet
- Koyson Ahmed, 24 snem na ka chnong Panisona, District – Syllet
- Faisal Alam, 21 snem na ka chnong Panisona, District – Syllet
Ya uwa yah ya ka kari uwa tip kam u Warif Uddin Laskar na Saraspur Gumra Bazar, Katigorah, Distrit – Cachar, Assam leh da kem neibhah man u bru wa jooh kit teiñ ya ki bru wa psiah tooh na Bangladesh wei ya ka kari leh da ksoh noh ya ka.
