U Director General of Police (DGP) ka Meghalaya, u L.R. Bishnoi da pyntip u wa da yoh u kem ya san ngut ki bru wa da emkti wow khayi ksiar kam chibynta ka yaw ya dai ya thied tooh yei ksiar.
Hawa yaklam wa ki laad pathai khubor ynne ka sngi, u DGP da pyntip u wa da yoh u kem 7 tylli ki Gold Biscuit kiwa khia 117 gms iwi wei dapoi waroh 817 gms wei ka takit ki pulit da chem ko yei rukom khayi tooh yei ksiar na Bangladesh cha Meghalaya iwa da poi cha Guwahati dep te cha Siliguri wei hadien da lai cha kylleiñ ki bynta ka ri.
Da pyntip u wa ha ka 24-06-22 heipor kamwa 4:20 i janmiet, ki pulit ka Ri Bhoi da pynsangeh kari ki ha u sarokbah NH-06 ha Nongpoh mar pyrchah ka Nongpoh Police Station hadien wa yoh yutip wa daw em ki bru wa wan cha Shillong na Assam deiwa rah yei ksiar wa da khayi tooh.
Ha ini i kynreh kari da chem wa uwi u bru wa tip kam u Abu Bakkar uwa na Barpeta, Assam da rah u ya i ksiar (24 Carat Gold Biscuit) wa wan na baar ri kiwa da murieh ha snieh-tympong iwa chongdor T. 50 lak wei iwa khia 0.8 kg.
Uni u bru ym ye u leh wow pynyoo ya ki kot ki sla heiwa hadien wa takit da khana u wa ya ini i ksiar da em wa e ha oo yow lai e cha u Saddique Ali wa u Sahjahan ha Barpeta, Assam.
Hadien wa pteiñ ya ka takit, da lai kynreh sa ha Barpeta deiwa ya krehlang wa ki pulit ka Assam heiwa da yoh wow kem T. 27 lak na u Sahjahan uwa chong chnong ka Barpeta, Assam.
Heiyatoh wa ini, da yoh wow kem ya 5 ngut ki bru wa emkti wow khayi tooh yei ksiar wei kini toh u Abu Bakkar, Sahjahan, Md Saddique Ali kiwa na Barpeta, u Aziz Lyngdoh na Laban waka Subalin Kharbani na Mawlai.
Da kem leh ya 10 tylli ki Mobile Phone kiwa da pynemkaam da kini kiwa khayi ksiar.
U DGP da pyntip u leh wa yei ksiar wa wanrah toh iwa na United Arab Emirates (UAE) dep te lai ki cha Bangladesh wei da pynpsiah cha India.
I dor ksiar ha UAE chi gram toh T. 4410 wei manda poi ha Bangladesh dapoi T. 4600 wei manda poi cha India da ku dor cha T. 5121.
U DGP da pyntip u leh wa kini ki bru toh kiwa jooh khayi drugs tangwa da kyruiñ ki chei ksiar hadien wa pynjoor ki pulit Assam wow kem ya kiwa khayi drug.
Katkam ki kot ki sla wa da yoh kem na kini ki bru, da thmu wow thooh ya 400 ngut ki khynroo na Shillong yow phon ya ki wow khayi drug wei wow khayi ksiar pyrchah ya ka aiñ.
