Ynnin ka sngi da em 9 ngut ki Rohingya wa da chah kem na khappood India-Bangladesh ha Cachar District ka Assam heiwa ki pulit da pyntip ki wa kini ki Rohingya da sah tooh ki la 13 snem hapoh India wei dapoi ki ha Hilara Railway Station ha ka 11 tarik hadien wa sah tooh ki ha khappood.
Kini ki 9 ngut wa kynthup ya 2 ngut ki chynrang, 2 ngut ki kynthai wa 5 ngut ki khynnah, da sah tooh ki ha kylleiñ ka ri wei da lai ki na Hyderabad cha Cachar.
U Senior Superintendent of Police (SSP) ka Cachar, u Numal Mahatta da ong u wa ya kini da kem na Katigorah hadien wa da tip tikna.
U Mahatta da ong u wa da sah ki ha kylleiñ ka India da boon snem wei ini wadep da sah ki ha Cachar wei ym em pyrchang ki wow kaap chiliang u pood cha Bangladesh wei da yoh noh u kem ki.
Kini kiwa chah kem da phla ki wa da psiah tooh ki cha India na Bangladesh kamwa 13 snem nachwa wei da jooh kreh ki ha Jammu & Kashmir wa Telangana.
Uwi na kiwa chah kem, u Abu Bakkar Siddiqui da phla u wa i tre ki toh na Myanmar wei kiwa ha-yung ki em ki ha Bangladesh wei neidaw wa sdang i khyndang ya kiwa na baar ri, da pyrchang noh ki wow liwan cha Bangladesh.
Uwi won uwa chah kem, u Samsur Alam da ong u wa da yoh yarap ki na ki kattu katni ki bru kiwa da wanrah ya ki cha Assam heiwa da phah sah chwa ya ki ha khappood.
Da khana u leh wa da phah ya ki wa ymtoh u mih ki cha lait dei sngi tangwa neidaw wa thngan da lai thied baam ki na yaaw heiwa da chah kem ki.
Discussion about this post