Ki pulit ka North Garo Hills hadien wa ha ka 7 tarik u bnai wa dep da chem ki yeiwa em kiwa booh ha ki Social Media da u bru wa tip kam u Goera Panthora deiwa ong wa ka GNLA (R) toh kawa da pynlang paaid biang (Regrouping) ha Garo Hills wei da booh yaka Head Quarter ha Tura.
Hadien ini haka 25 tarik u bnai wa da dep hi, ki pulit ka Kharkutta Police Station da yoh ki ya ka ujor wa em ki bru wym tipmit kiwa da dawa poisa hei pyrtuid ka GNLA (R) deiwa Phone.
Hadien wa yoh ya kani ka FIR, ki pulit ka North Garo Hills Police da pynman ki yei takit wei da kem ki ya 3 ngut ki bru kiwa kynthup ya u Sengsan K. Marak uwa tip leh kam u Kodarok (40 snem) uwa na thaaiñ Resubelpara Khardang wei man u leh u dkhot warim ka UALA.
Da kem leh ya u Tiljash Sangma (40 snem) na A.dokgre uwa man kam uwa krehlang wa u Sengsan K. Marak uwa lai thooh ya ka poisa na ki bru.
Sa uwi uwa chah kem toh u Suresh Sangma uwa tip kam u Pot (42 snem) uwa da chah kem na A.dokgre wei uni toh uwa yarap ya u Sengsan K. Marak wow lai chim poisa na ki bru wa khih yong samen wei wow thooh leh yei Number Phone ki bru wow dawa poisa ki.
Ki pulit da kem ki leh ya ka ki Mobile Phone deilang wa ki SIM Card wa pynemkaam da kini ki bru.
Ka takit da lai ko chakhmat yow kem sa ya kiwi kiwa emkti ha ini i kaam.
Discussion about this post