Katkam wa pyntip u SP ka East Khasi Hills u S. Nongtnger, ha ka 25-08-2020 uwi u bru wa tip kam u Arnell Steward Nongdhar uwa chong wa sah ha Wahingdoh Block-III, Shillong da wan u cha ka Laitumkhrah Police Station uwa da pyntip wa heipor 4 waje i janmiet hadien wa wan u na Amazon Office da ka kari Maruti Alto yong oo wa em ya u number ML-05-P-6115 yow lai cha Laitumkhrah, manda poi u ha dong Goraline haneiñ ka yingkieñ, da yoo u ya uwi u bru wa pynsangeh ka ka thuk thuk u hapyrdi sarok wei manda phah kyrriah u oo, uni u bru da sdang u wow pynkhor wei da khut u ya ki lok yong oo kiwa em hajan wei da wan ki kamwa 10 ngut ki jait bru Punjabi kiwa da sdang wow dat oo.
Neiliang ki pulit da yah ki oo wut wut cha i thaw sumaar heiwa u Doctor da ong u wa da em i ad u malu mala i khmat uwa chah dat wa i mynsoo wym toh iwa joor.
Ki pulit SOT da lai ki deiwa phah ya ki wow kem ya kiwa emkti wei manda poi ki ha Goraline da phah khut ya u waheh chnong heiwa deilang wa uwa ujor wa u waheh chnong da lai ki cha ini i thaw wa jia yow kem ya kiwa emkti.
Ha ini i thaw wa jia, da em kiwa sakhi ya iwa jia kiwa da wan chakhmat wei deiwa yarap ki da kem ya ki 4 ngut u Sachin Singh (26 snem), u Udham Singh (23 snem), u Malkit Singh (19 snem) wa u Vikash Singh (20 snem).
Ya kini kiwa chah kem da pyntikna da uwa chah dat kam kiwa emkti ha ini i kaam.
Neidaw ka khlam COVID-19, ya kini kiwa chah kem da phah wow leh yaka Medical Examination kamjooh ka RT-PCR Test wei da booh ki hapoh Quarantine Centre katkam wa da booh por hadooh wa yoh ya ka Test Result. Hadien wa yoh yaka Test daw rah ya kiwa chah kem cha ka yung bichaar wei daw booh hapoh thnat yow pynman yaka takit.
Ynne da kem leh sa ya uwi uwa tip kam u Rocky Singh uwa 40 snem i rta wei dang booddien yow kem leh sa ya kiwi kiwa emkti.
