Ka STIEH, HANM Women’s Wing waka KSU Khliehriat Unit hadien wa da yoh yutip na kawi ka khynnah kynthai wa lai skur ha Khliehriat kawa dang 19 snem i rta wa em 2 ngut ki baar jylla kiwa tip pyrtuid kam u Monjura Ahmed wa u Halim Uddin kiwa na Karimganj, Assam kiwa dai slipar ha yaw Khliehriat wa da thmu ki wow slaitbor ya kani ka khynnah wei da yoh ki wow jrong kti ya ka haka 8 tarik heipor wa mut ko wow lai thied slipar, wei neiliang ki le seiñ wa ki pulit da kem ki ya kini.
Ha ini iwa jia, uwa dai slipar da khut u ya kani ka khynnah cha kdong deiwa ong wa em ki slipar wa thymme wa dang poi wei deiwa khooid mynsien da psiah ko cha i thaw wa booh (Stock) slipar heiwa da sdang u wow tba kti ka kani ka khynnah ha i doh i pran ko. Heini kani ka khynnah da ksaid ko wei da wan psiah sa u lok yong oo uwa da sdang leh wow jrong kti uwa da ong wa toh sa oo kattu wei da pyrchang u leh wow doh ka deibor. Heini kani ka khynnah da yaleh pyrchah ko katwa ye wei da yoh ko wow yut na ini i thaw.
Manda poi ko ha yung wa sah wai da khana ko yeini heiwa da pyntip yeini cha ka President ka STIEH.
Ynne ka 11 tarik da lai wow ujor ha Women’s Police Station Khliehriat wei deiwa yarap ki pulit da lai kem ya kitai ki ar ngut.
Hawa thmu wow kem ya u Halim Uddin da yoh u wow yut heiwa da hap wow kdong oo wei da yoh wow ksoh ya oo da ki paidbah hadien wa kbai paan yarap wei da ekti ya kini ki arngut cha ki pulit.
Neiliang kini ki seiñ kynthai da kyntu ki ya ki para kynthai lane ki manbei wa lada em uwon uwon wa jrong kti ya ki wym toh u tieñ ki wei wow mih chakhmat yow ujor cha ki bor yong ka aiñ. Ym toh wow yang hadooh wa da chah slaitbor neibhah wot lada chah jrong kti toh u pyntip yaki seiñbhalang yow yoh u ujor cha ki bor yong ka aiñ.
Da phah khubor wa che yaki kynthai Khasi kiwa yada mynder wym toh u leh ki yeini wei kiwa leh ki leh daw ngat ki ha ka jooh ka chah ujor lang.
