Chah kem ki dkhot ka NSCN-K na Khliehtyrchi, WJH

Jowai: Ynnin ka 13 tarik hadien wa yoh yutip wa tikna, ka Special Cell yong ka WJH Police da kem ki ya ki dkhot yong ka NSCN-K, Finance Cadres kiwa krehkaam ha ki thaiñ Khliehtyrchi, WJH heiwa u Dy. Secretary Revenue yong ka NSCN-K, u Gaising Maringmei wa khut sin u Ronal uwa 40 snem i rta da chah kem u na i yung wa sah wai u iwa em ha Mookyniang, Khiehtyrchi.

Hadien wa chah kem u, da yoh won u kem sa ya ar ngut ki dkhot kani ka seiñ wa kynthup ya u Khamjang Rongmei uwa 35 snem i rta wa u Thuanguangpou Kamei wa khut sin kam u Benjamin uwa 40 snem i rta.

Na kini ki le ngut da yoh ya ka poisa wa T. 2,00,000 (Ar Lak), ki SIM Card, Mobile Phone wa ki kot ki sla kamjooh kai chithi dawa poisa hei pyrtuid yong ka NSCN-K .

Hawa kylli takit, u Gaising da pyntip u wa ka M/S Bharatiya Company Limited kawa krehkaam ha Manipur da dep su ko T. 25,00,000 (arphaw san lak) ka poisa wa dawa u ha ka 10-05-2018 ha WJH wei T. 13,00,000 (Khatle Lak) won da kit da ka kurim u, ka Tanthaoliu Gonmai cha Imphal na Shillong ha ka 13 tarik lyngba ka Night Super na Shillong cha Dimapur.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Mar ya tip yeini ki pulit ka jylla da pyntip ki cha ki pulit ka jylla Manipur kiwa da ksoh ya kani ka bus wei da kem ya ka Tanthaoliu Gonmai na Imphal West District chirup wa kani ka poisa wa T. 13,00,000 (Khatle Lak). Ki pulit ka WJH daw lai ki cha Manipur wow chimkti noh ya ka Tanthaoliu Gonmai.

Heijooh i por uwi u dkhot ka seiñ uwa rah tiar (Courier) ya ka, u Dimchiulungam da kem ya oo dei yarap ki pulit ka Shillong na Police Bazaar.

Neiliang ki bor pulit da ong ko wa ka NSCN-K Finance Wing da pynemkaam ko ya ka ri-loom Jaiñtia kam ka thaw wow rieh na ki bor pulit wow dawa poisa wei wow thied ya ki tiar siat.

Da register ya ka case Jowai PS Case No. 115(5)2018 u/s 121/121A/120B/384 IPC r/w Sec 10/13 UAP Act wei da yah ya ki hakhmat u District Session Judge, WJH wei daw kset chwa ya ki 4 sngi.

Ki pulit hapoh i yahkhmat u Jason Mairom MPS, SDPO Amlarem daw pynman ki ya ka takit wa bniah wow chemdien chooh chooh yei kaam ka NSCN-K Finance Wing.